Gaz, qant jáne lıftter: ShQO-da qaı salalarda básekelestikke qatysty zań talaptary buzylǵan
ÓSKEMEN. KAZINFORM — Shyǵys Qazaqstan oblysynda jyl basynan beri básekelestikke qatysty zań talaptaryn buzý boıynsha 6 fakti tirkeldi.
QR Básekelestikti qorǵaý jáne damytý agenttigi ShQO boıynsha departamentiniń basshysy Aslan Álippaevtyń málimetinshe, olar densaýlyq saqtaý, suıytylǵan munaı gazyn bólý, lıftterge tehnıkalyq qyzmet kórsetý, qanttyń kóterme saýdasy jáne elektr energııasyn kommertsııalyq esepke alý júıeleri salalaryna qatysty.
Bes faktige qatysty is tolyq aıaqtalsa, bireýi áli oryndalý satysynda.
— Budan bólek, departament kvazımemlekettik sektordyń 28 nysanyna monıtorıng júrgizip, jeke bıznestiń damýyna kedergi keltirý faktisin anyqtaǵan. Bul jumystyń maqsaty — naryqtaǵy ashyq básekelestikti qamtamasyz etip, kásipkerler úshin teń múmkindik qalyptastyrý, — deıdi ol.
Eske salsaq, osyǵan deıin Parlament palatalarynyń birlesken otyrysynda Joǵary aýdıtorlyq palata tóraǵasy Álıhan Smaıylov memlekettik tapsyrmalardan básekelestik naryqtaǵy qyzmetter alynyp tastalýy kerek ekenin aıtty.
