Gaz eseptegish kórsetkishterin berý úshin jasandy ıntellekt qoldanyla bastady
ShYMKENT. KAZINFORM — Otyn-energetıka keshenin tsıfrlyq transformatsııalaý aıasynda QazaqGaz Aimaq kompanııasy gaz eseptegish qurylǵylarynyń kórsetkishterin jasandy ıntellekt tehnologııalaryn qoldaný arqyly avtomatty túrde jiberýge arnalǵan mobıldi qosymshany pılottyq rejımde engize bastady.
— Tsıfrlyq qyzmet Qyzylorda, Qostanaı jáne Túrkistan oblystarynda synaqtan ótip jatyr. Qosymshany qazirdiń ózinde 7 myńnan astam tutynýshy júktep alǵan, onyń ishinde Túrkistan oblysyndaǵy belsendi paıdalanýshylar jańa servıstiń yńǵaılylyǵyn alǵashqylardyń biri bolyp baǵalap úlgerdi.
Qosymshanyń jumys isteý qaǵıdasy qarapaıym. Tutynýshy eseptegishtiń fotosýretin túsiredi, al jasandy ıntellekt negizindegi júıe málimetterdi avtomatty túrde tanıdy jáne óńdeıdi. Bul baqylaýshynyń kelý qajettiligin joıady, shottardyń jasalýyn jedeldetedi jáne qatelerdi barynsha azaıtady, — delingen Energetıka mınıstrligi habarlamasynda.
QazaqGaz Aimaq kompanııasynyń málimetinshe, bul servıs operatorlarǵa túsetin júktemeni azaıtyp, esep aıyrysýdyń ashyqtyǵyn arttyrýǵa jáne halyq arasynda gazdy uqypty tutyný mádenıetin qalyptastyrýǵa múmkindik beredi.
Jaqyn arada qosymshanyń fýnktsıonaly keńeıtiledi. Tutynýshylar tólem tarıhyn kórý, eseptegishterdi tekserý merzimderi týraly eskertýler men gaz jelilerindegi josparly jumystar týraly habarlamalar alý múmkindigine ıe bolady. Sondaı-aq vırtýaldy kómekshi men adal tutynýshylarǵa arnalǵan yntalandyrý júıesi — bonýstar men keshbek túrinde engizý josparlanyp otyr.
Energetıka mınıstrligi halyqqa kórsetiletin qyzmet sapasyn arttyrýǵa jáne gazben jabdyqtaý salasyndaǵy ashyqtyq pen tıimdilikti qamtamasyz etýge baǵyttalǵan tsıfrlyq bastamalardy qoldaıdy.
Aıta ketelik Jasandy ıntellekt JOO-ǵa túsý protsesin jeńildetedi.