Gaz ballonynyń jarylýy: tutynýshy qaýipsizdik erejesin saqtamaǵan

AQTÓBE. QazAqparat - Aqtóbelik tótenshe jaǵdaılar qyzmeti gaz ballonynyń jarylýy qaýipsizdik erejesiniń saqtalmaýynan bolýy múmkin dep otyr. Qazirgi kezde tekserý jumystary júrip jatyr, dep habarlaıdy QazAqparat tilshisi.

Eske salsaq, Aqtóbede gaz ballony jarylyp, bir adam aýrýhanaǵa túsken bolatyn. Oblystyq tótenshe jaǵdaılar qyzmeti shaqyrtylǵanymen, órt sóndirýshilerdiń esh qajeti bolmapty.

«4 qańtar kúni «Tıýlpan-8» baý-baqsha ujymynda ornalasqan jeke úıde turmystyq gaz ballony jaryldy. Shaqyrtý ornyna órt sóndirý jáne avarııalyq-qutqarý jumystary qyzmeti, apattar medıtsına ortalyǵy, jedel qutqarý jasaǵynan 20 adam men 5 tehnıka jiberildi. Jarylys saldarynan 52 jastaǵy úı ıesiniń betin, 51 jastaǵy áıeldiń sol jaq ıyǵyn kúıik shaldy. Gaz ballony turǵan kireberis tolyqtaı qulady. Zardap shekkenderge oqıǵa ornynda alǵashqy medıtsınalyq kómek kórsetildi. Órt sóndirgish zattar qoldanylǵan joq. Aldyn ala belgili bolǵany - jarylys qaýipsizdik erejeleriniń saqtalmaýynan oryn alǵan», - dep habarlady oblystyq TJD baspasóz qyzmeti.

Mamandardyń aıtýynsha, qazirgi ýaqytta isti polıtsııa tergep jatyr.