Gaz ballondary men eńbek qaýipsizdigi: Úkimet shaǵyn bızneske baqylaýdy kúsheıtpek
ASTANA. KAZINFORM – Úkimet eńbek qaýipsizdiginiń saqtalýyn iri kásiporyndarda ǵana emes, shaǵyn jáne orta bıznes nysandarynda da qatań baqylaýǵa almaq. Premer-Mınıstr Oljas Bektenov qoǵamdyq tamaqtaný oryndaryn tekserýdi kúsheıtip, jyl sońyna deıin ónerkásiptik qaýipsizdiktiń tsıfrlyq platformasyn iske qosýdy tapsyrdy.
Premer-Mınıstr ónidiris qaýipsizdigi salasynda zamanaýı tsıfrlyq monıtorıng, beınebaqylaý jáne avtomattandyrylǵan baqylaý júıelerin engizýdi jandandyrý keregin atap ótti.
Eńbek mınıstrliginiń Eńbek táýekelderi kartasyna barlyq óndiristik kásiporyndar, onyń ishinde qaýipsizdik pen eńbekti qorǵaý parametrleri engizilgen.
– Alaıda, buzýshylyqtar kásiporyndarda ǵana emes, qurylys nysandarynda, qoǵamdyq tamaqtaný oryndarynda da bolýy múmkin. Olar eshqandaı monıtorıngpen jáne júıeli tekserýlermen qamtylmaǵan. Sondyqtan barlyq shaǵyn jáne orta bıznes sýbektilerine qatysty qatań baqylaýdy qamtamasyz etý qajet. Azamattarymyzdyń densaýlyǵy men qaýipsizdigi basty orynda turýǵa tıis, – dedi O. Bektenov.
Eńbek mınıstrligi múddeli memlekettik organdarmen birlesip, Memlekettik eńbek ınspektsııasyna keńeıtilgen ókilettikter berý bóliginde zańnamalyq túzetýler ázirleýi kerek. Bul iri kásiporyndarda ǵana emes, shaǵyn jáne orta bıznes salasynda da eńbek tártibin nyǵaıtyp, qaýipsizdikti saqtaýǵa yqpal etedi.
–Turǵyn úılerge japsarlas salynǵan nemese solardyń ishinde ornalasqan qyzmet kórsetý uıymdaryna aıryqsha nazar aýdarý qajet. Ákimdikter men Tótenshe jaǵdaılar mınıstrligi Bas prokýratýramen birlesip, gaz ballondarynyń saqtalýy men paıdalanylýyn baqylaý úshin qoǵamdyq tamaqtaný oryndaryna tekserý júrgizsin, – dedi Oljas Bektenov.
Sonymen birge, Úkimet basshysy jyl sońyna deıin ónerkásiptik qaýipsizdik salasyndaǵy tsıfrlyq platformany engizýdi tapsyrdy.
Aıta keteıik, endi Qazaqstanda iri kásiporyn basshylarynyń jumysy óndiristik jaraqat deńgeıi boıynsha baǵalanatyn bolady. Óndiris qaýipsizdigine qatysty KPI engizilip, onyń oryndalýy basshylardyń jalaqysy men qyzmette qalýyna tikeleı áser etedi.
