Gaz ballon jabdyǵy bar mashınalar aıyppul turaǵyna jiberilip jatyr
ASTANA. QazAqparat – Qutqarýshylar men polıtsııa qyzmetkerleri jabyq parkıngterde gaz jabdyqtary bar mashınalardyń bar-joǵyn tekserip jatyr. Sonymen qatar turǵyndarǵa ondaı mashınalardy turaqqa qoıýǵa tyıym salynatyny jaıly túsindirildi, dep habarlaıdy QazAqparat.
Tótenshe jaǵdaılar mınıstrliginiń málimetinshe, elimizde «Gazballon» jedel profılaktıkalyq is-sharasy ótkizilip jatyr. Aqtóbe jáne Batys Qazaqstan oblystary da qalys qalǵan joq.
24 tamyzda Tótenshe jaǵdaılar departamenti men Polıtsııa departamentiniń qyzmetkerleri «Gazballon» respýblıkalyq jedel aldyn alý is-sharalary aıasynda reıdtik is-sharalar ótkizdi.
Reıd barysynda Oral qalasynyń «Oral», «ASIA MALL» saýda-oıyn-saýyq ortalyqtarynyń, «ıÝnıs sıtı» jáne «Olımp» turǵyn úı keshenderiniń jerasty avtoturaqtarynda órt qaýipsizdigi erejelerin buzýdyń 4 faktisi anyqtalyp, ákimshilik is qozǵaldy. Atalǵan is-sharalar barysynda barlyq avtokólik ıelerine qaýipsizdik talaptary jetkizildi.
Sonymen qatar reıd barysynda avtokólik quraldaryna tıisti ruqsatsyz gaz-otyn júıesin ornatqan avtokólik ıelerin anyqtaý jumystary júrgizilip jatyr. Qujattary joq gaz ballondy jabdyqtary bar 5 avtomashına aıyppul turaǵyna jóneltildi.
«Gazballon» jedel profılaktıkalyq is-sharasy jalǵasyp jatyr.
TJM órt qaýipsizdigi erejelerinde qozǵaltqyshtary syǵylǵan tabıǵı gazben nemese suıytylǵan munaı gazymen jumys isteıtin gaz ballondy jabdyqpen jaraqtandyrylǵan, ózge maqsattaǵy jáne olarǵa japsarlas salynǵan ǵımarattarda, sondaı-aq jer deńgeıinen tómen ornalasqan avtoturaqtar men jabyq tıptegi úı-jaılar men parkıngterdegi avtokólikterdiń turaǵyna tyıym salynǵanyn eske salady.
