Gaz baǵasyn 50 teńgege deıin túsirýdiń múmkindigin kórip turǵan joqpyz – mınıstr

NUR-SULTAN. QazAqparat – QR Energetıka mınıstri Maǵzum Myrzaǵalıev suıytylǵan munaı gazynyń baǵasyn 50 teńgege deıin túsirý talabyn oryndaý qanshalyqty múmkin ekenin aıtty, dep habarlaıdy QazAqparat tilshisi.

Úkimet ereýilge shyqqandardyń talabyn oryndap, gazdyń baǵasyn 1 lıtr úshin 50 teńgege deıin túsirý týraly máseleni qarastyryp otyr ma? QR Energetıka mınıstrine ortalyq kommýnıkatsııalar qyzmetinde ótken brıfıngide osyndaı suraq qoıyldy.

«Kóterme baǵasy bar, tasymal jáne saqtaý shyǵyndary bar. Osynyń bárin qarap janarmaı stansalaryndaǵy suıytylǵan gazdyń ózindik qunyn eseptep shyǵaramyz. Qazirgi tańda onyń mólsheri 80 teńgeniń kóleminde qalyptasyp otyr. Sonda janarmaı quıý stansalaryna qalatyn marja 40 teńgege deıin, ıaǵnı, 50 paıyzǵa jetken bolatyn. Túnde vıtse-mınıstr Aqtaý qalasyna ushyp bardy. Ol sol jaqta janarmaı stansalarynyń ıelerin kezdesti. Muny bıznestiń áleýmettik jaýapkershilig dep aıtyp otyrmyz. ıAǵnı, ahýal basqa sheshimdi qajet etip otyrsa, olarǵa da óz tábetterin shekteý qajet. Meniń qazir sózýarlyqqa salynǵym kelip otyrǵan joq. Biraq jaǵdaıdy osylaı kórip otyrmyn», -dedi Maǵzum Myrzaǵalıev.

Sondaı-aq vedomstvo basshysy dál qazir gaz baǵasyn 50 teńgege deıin túsirýdiń múmkindigin kórip turmaǵanyn aıtty.

«Bul suraqqa birneshe ret jaýap berdim. Óndiristiń ózindik quny bar. Bar bolǵany osy ǵana. Jańaózendegi gazdy qaıta óńdeý zaýytynda da dál sondaı qala turǵyndary jumys istep júr. Túsinip otyrsyz ba? Gaz óndirisiniń ózindik quny shamamen 100 myń ekenin, bul halyq qalap otyrǵan 50-60 teńgeden kóp ekenin eskersek, aldymyzda máseleni sheshýdiń eki joly ǵana bar. Ne únemi tapshylyqta kún keship, bir kúni zaýyttarymyz toqtaıdy, ne osyndaı asa jaǵymdy emes sheshim qabyldanady. Qazirgi ahýaldy obektıvti zerdelesek, osylaı bolyp otyr. Naryq zańyn eshkim alyp tastaǵan joq. Búgingi tańda biz halyqtyń ol talabyn oryndaýdyń múmkindigin kórip turǵan joqpyz», - dedi mınıstr.