Gaz baǵasy óńirlerde ártúrli - Qanat Bozymbaev
ORAL. QazAqparat - Gaz baǵasy óńirlerde ártúrli. Bul týraly BQO ákiminiń halyqqa bergen esebi kezinde turǵyndar saýalyna jaýap bergen QR Energetıka mınıstri Qanat Bozymbaev aıtty, dep habarlaıdy «QazAqparat» tilshisi.
Mınıstrdiń aıtýynsha, gaz baǵasy batysqazaqstandyqtar úshin de mańyzdy.
«Birden aıtaıyn, tegin gaz bolmaıdy. Naryqtyq ekonomıka jaǵdaıynda ár ónimniń ózindik quny bar. Batys Qazaqstan oblysy 100 paıyz derlik Qarashyǵanaq gazymen qamtylady. Biraq ol qyshqyl bolǵandyqtan, Orynbordaǵy gaz óńdeý zaýytyna jóneltiledi. Tazartylyp, qurǵaq kúıinde oralǵan kezde osy gazdyń shekaradaǵy quny 43 dollardy quraıdy», dedi mınıstr.
Sodan keıin oblys úshin 11970 teńge kóleminde kóterme baǵa bekitiledi. Buǵan «QazTransGazAımaq» AQ gaz taratý jelisiniń baǵasy qosylady - QQS-tan alǵanda 17 myńdaı teńge bolady.
«Bul az ba, kóp pe degenge kelsek, Aqtóbe men Atyraýǵa qaraǵanda, árıne, joǵary. Óıtkeni olarda gaz óńdeý zaýyty bolǵandyqtan, baǵa tómen. Al Ońtústik Qazaqstan, Jambyl, Almaty oblystarymen salytyrǵanda, Batys Qazaqstanda baǵa arzan. Mysaly, OQO ákimi ondaǵy gazdyń baǵasy 34 myń teńge turatyny jóninde áldeneshe ret jazdy. Bylaısha aıtqanda, óńirlerde gaz baǵasy túrlishe bolyp otyr», dedi Qanat Bozymbaev.
Mınıstr, sondaı-aq, jergilikti ákimdikter janynda gaztehnıkalyq ınspektsııa qurý máselesine de toqtaldy. «Qazir turǵyn úı qatynastary týraly zańǵa ózgerister engizilýde. Gaztehnıkalyq ınspektsııalar jergilikti atqarýshy organdar janynda jumys jasamaqshy. Jyldyń ortasyna qaraı Úkimet zań jobasyn Parlamentke joldaıtyn bolady», - dedi ol.
Aıta keteıik, oblys ákimi Altaı Kólginovtiń eseptik kezdesýi barysynda turǵyndar gaz baǵasynyń joǵary ekendigine oraı alańdaýshylyq bildirip, sonymen qatar qyzmet kórsetýshi mekemelerdiń jumysyna qatysty syn aıtqan bolatyn.
