Gavaııdegi sý tasqyny el ekonomıkasyna 1 mıllıard dollar shyǵyn ákeldi

ASTANA. KAZINFORM - Gavaııde 2000-nan astam adam sońǵy 20 jyldan astam ýaqyt ishindegi eń qatty sý tasqynynan keıin elektr qýatynsyz qaldy. Bul sý tasqyny araldardaǵy nóser jańbyr saldarynan bolǵan, dep habarlaıdy Associated Press.

Gavaııde bir apta buryn nóser jańbyr jaýdy. Nóserden keıingi zalal 1 mıllıard dollarǵa baǵalandy, al bılik ókilderi daýyl júzdegen úı men kólikterge zııan keltirgenin aıtady. Sý basqan jerlerden 200-den astam adam qutqaryldy. Ázirge qaza tapqandar týraly habarlama joq.

Aral halqynyń shamamen 95%-yn elektr qýatymen qamtamasyz etetin Hawaiian Electric kompanııasynyń brıgadasy shuǵyl jumys júrgizip jatyr. 1200 turǵynǵa elektr qýaty qalpyna keltirildi.

Gýbernator Djosh Grın daýyl Maýı aralyndaǵy áýejaıǵa, mektepterge, joldarǵa, úılerge jáne aýrýhanalarǵa zııan keltirgenin habarlady. Sheneýnikter 120 jyldyq Vahıava bógetiniń isten shyǵýynan qaýiptenedi, biraq sý deńgeıi qazir tómendedi.

Meteorolog Mettıý Foster eń qatty daýyl artta qaldy dep sanaıdy. Sarapshylardyń aıtýynsha, jahandyq jylyný saldarynan Gavaııdegi qatty jaýyn-shashynnyń qarqyndylyǵy men jıiligi artty.

Gavaıı shtatynda sý tasqynyna baılanysty 5,5 myń adamdy evakýatsııalaý jarııalanǵany habarlandy.