Gavaııde 550 jyldyq tarıhy bar eskertkish opyrylyp tústi
ASTANA. KAZINFORM — Gavaıı aralynda 5 ǵasyrlyq tarıhy bar áıgili Hōlei Sea Arch tabıǵat eskertkishi Tynyq muhıtyna opyrylyp tústi. Gavaıı janartaýlary ulttyq saıabaǵynda ornalasqan bıiktigi 27 metrlik tas arka týrısterdiń sýretke túsetin súıikti orny edi, dep habarlaıdy Kazinform Bild basylymyna silteme jasap.
Arkanyń dál qashan opyrylǵany belgisiz. 23 qyrkúıekte aman turǵan, biraq 27 qyrkúıektiń keshine qaraı ony izdep barǵandar ornyn sıpap qaldy. Nolo tropıkalyq daýyly aıdap ákelgen nóser men bıik tolqyndar tabıǵı eskertkishti qıratyp ketken bolýy múmkin.
Degenmen, arkanyń opyrylýy tosyn bolǵan joq. Onyń aınalasyndaǵy jaǵalaý jartastary jyldar boıy tolqyndar men jeldiń áserinen erozııaǵa ushyraǵan. 2018 jyly Kılaýea janartaýy atqylaýynan týyndaǵan jer silkinisteri de qatty áser etken. Jergilikti bılik opyrylý qaýpi baryn eskerip, 2020 jyly tamashalaý alańyn jaýyp qoıǵan.
Gavaıı janartaýlary ulttyq saıabaǵy týrısterdi opyrylǵan tabıǵat eskertkishine jaqyndamaýǵa shaqyrady.
Arkanyń ózi shamamen 550 jyl buryn ejelgi qatyp qalǵan lavanyń bir bóligi erozııaǵa ushyraýy nátıjesinde paıda bolǵan. Ulttyq saıabaq qyzmetiniń málimdeýinshe, mundaı túzilimder ýaqytsha qubylys bolyp keledi, olardyń keıbiri qırap, ornyna basqa túzilimder paıda bolýy múmkin.
Eske sala keteıik, Gavaııdegi Kılaýea janartaýynan qaıtadan rekordtyq deńgeıde lava fontandary atqylaǵan.
Tamyz aıynda «Lala» daýyly Gavaııge zor shyǵyn ákelgen.
