Gavaıı shtatynda 100 jasqa tolmaǵandarǵa temeki satýǵa tyıym salynýy múmkin
ASTANA. QazAqparat - AQSh-taǵy Gavaıı shtatynda júz jastan kishi tulǵalarǵa temeki satýǵa tyıym salý týraly zań jobasy qaralyp jatyr. Bul týraly dúısenbide CNN telearnasy habarlady.
Onyń deregi boıynsha, bul bastamany respýblıkashyl Rıchard Krıgan kótergen. Zańnamada Gavaııdiń «temekiden táýeldilikten zardap shegetini» aıtylǵan. Al «memleket temeki buıymdaryn satýdan túsken salyqtyń arqasynda úlken kólemde aqsha alyp otyr».
«Temeki - adamzat tarıhyndaǵy qyrǵynǵa ushyratatyn artefakt», - delingen zań jobasynda.
CNN deregi boıynsha, tyıym 2024 jyly birneshe kezeń boıynsha engizilmekshi. Temekini satýǵa ruqsat etiletin eń tómengi jas shamasy birt-birte ósiriledi. Bul shekteýlerdiń elektrondyq temeki men sıgaraǵa qatysy joq, dep atap ótti telearna.
Qazirgi tańda Gavaıda 21 jasqa tolmaǵan azamattarǵa temeki satýǵa tyıym salynǵan.
