Gavaıdaǵy apokalıpsıs: ondaǵan qurban, myńdaǵan qıraǵan ǵımarat, mıllıardtaǵan dollar shyǵyn

GONOLÝLÝ. QazAqparat – Gavaı araldaryndaǵy órtten qaza tapqandar sany 67 adamǵa jetti, bul shtat tarıhyndaǵy qurbandar sany kóp bolǵan tabıǵı apat, dep habarlaıdy QazAqparat BBC News-ke silteme jasap.

Basqa júzdegen adam joǵalǵandar tiziminde, sondyqtan qurbandar sany taǵy ósýi múmkin.

Komendanttyq saǵat Lahaınada kún saıyn jergilikti ýaqyt boıynsha 22.00-den 06.00-ge deıin jumys isteıdi, al qalanyń eń kóp zardap shekken bóligi izdeý-qutqarý qyzmetteri úshin áli de shekteýli.

Esterińizge sala keteıik, buǵan deıin AQSh senatory áleýmettik jelide Lahaına «tolyǵymen derlik órtenip ketkenin» aıtqan bolatyn.

Lahaına ornalasqan batys Maýı áli kúnge deıin elektr qýaty men sýsyz otyr.

«Lahaına qıraǵan aımaqqa aınaldy. Olar (turǵyndar) óz ómirlerinde buryn-sońdy mundaıdy kórmegen», - dedi apattan keıin qalaǵa kelgen gýbernator Djosh Grın. - Óte saq bolyńyzdar, abaı bolyńyzdar».

Ol Maýı aralyndaǵy órtten bolǵan zııandy óteý úshin uzaq jyldar qajet bolatynyn aıtty, kóptegen adamdar baspanasyz qaldy. Jyl saıyn eki mıllıonǵa jýyq týrısterdi tartatyn baı tarıhy bar jaǵalaýdaǵy Lahaına qalasynda 1000-nan astam ǵımarat qırady.

Juma kúni Maýı okrýginiń sheneýnikteri Lahaınada taǵy 12 adamnyń mert bolǵanyn rastady.

Maýıdegi órtter Gavaıdaǵy eń qaýipti tabıǵı apat boldy, ol tipti 1960 jyly 61 adamnyń ómirin qıǵan tsýnamıdi basyp ozdy.

Aralda kóptegen baı adamdar turady, sonyń ishinde Amazon negizin qalaýshy Djeff Bezos. Ol súıiktisi Loren Sanches ekeýi órtten zardap shekkenderge kómektesý úshin 100 mıllıon dollar bólýge ýáde berdi.

Gavaıdyń Maýı aralynda jáne Úlken aralda buryn-sońdy bolmaǵan órt seısenbi kúni keshke bastaldy.