Gavaı araldaryndaǵy órt qurbandary 93 adamǵa jetti

GONOLÝLÝ. QazAqparat – Maýıdegi aýqymdy órtten qaza tapqandar sany 93 adamǵa jetti, dep habarlaıdy QazAqparat BBC News-ke silteme jasap.

Tarıhı Lahaına qalasyn joıǵan órt AQSh júz jyldyǵyndaǵy kóp adam qaza tapqan tabıǵı apat bolyp otyr.

Gavaı gýbernatory Djosh Grın senbide qurbandardyń sany «aıtarlyqtaı artýy» múmkin ekenin eskertti, óıtkeni sot-medıtsınalyq saraptama máıitterdiń jeke basyn anyqtaýdy jalǵastyrýda. Júzdegen adam joǵalyp ketkender tiziminde.

Grınniń aıtýynsha, órt «Gavaı araldarynda buryn-sońdy bolmaǵan eń aýyr tabıǵı apat. Qazir bizdiń maqsatymyz — adamdardy tabystyryp, olardy turǵyn úımen jáne medıtsınalyq kómekpen qamtamasyz etý, sodan keıin qalpyna keltirýge kirisemiz», - dep qosty gýbernator.

Qazirgi ýaqytta órt baqylaýǵa alynǵanymen, ony tolyǵymen sóndirý jumystary araldyń keıbir bólikterinde, sonyń ishinde órtengen Lahaınanyń aınalasynda jalǵasyp jatyr.

Bılik kúsh-jigerin araldyń jaǵalaý aımaǵyndaǵy úıindilerdiń astynan máıitterdi anyqtaı alatyn arnaıy úıretilgen ıtterdi qoldana otyryp, baryn salýda.

Ázirge izdeý aımaǵynyń tek 3%-y qamtyldy, dedi jergilikti polıtsııa bastyǵy Djon Pellete. Onyń aıtýynsha, barlyq qurbandardy anyqtaý úshin jedel DNQ taldaýy qajet.

Órt tutanǵanna bastap 2000-nan astam ǵımarat búlingen nemese qıraǵan. Olardyń kópshiligi Lahaınadaǵy úıler.

Vashıngtonnan Gavaıǵa kómek kórsetý kúshin úılestiretin Tynyq muhıtyndaǵy apattardy joıý ortalyǵynyń málimeti boıynsha, Maýıdi qalpyna keltirý quny 5,5 mıllıard dollarǵa baǵalanyp otyr.