Gavaı araldaryndaǵy órt: Qaza tapqandar 100-den asty
ASTANA. QazAqparat – Maýı aralyndaǵy orman órtinen keıin 101 adamnyń máıiti tabyldy. Bılik ókilderi qaza tapqandar sany budan kóp bolatynyn eskertti, dep habarlaıdy QazAqparat Deusche Welle basylymyna silteme jasap.
Amerıkanyń Gavaıı shtatynyń gýbernatory Djosh Grın Maýı aralynda ormannan bastalǵan órtten «101 adam qaıtys boldy» dep habarlady.
Onyń sózinshe, apat aımaǵynyń tórtten bir bóliginen astam jeri tekserildi.
Qutqarýshylar janyp ketken úılerdiń kúlin tazartyp, arnaıy úıretilgen ıtter adam máıitin tabýǵa kómektesip jatyr.
D.Grın tabıǵı apat qurbandarynyń sany aıtarlyqtaı kóp bolatynyn, jaqyn kúnderi eki ese nemese úsh esege artýy yqtımal ekenin eskertti.
Anadolý agenttigi AQSh prezıdenti Djo Baıdenniń sózin keltirýde. Aıtýynsha, Gavaı araldaryndaǵy órt sońǵy 100 jylda bolǵan eń alapat oqıǵa. El basshysy Vıskonsın shtatynda sóılegen sózinde jaqyn kúnderi Gavaııge baratynyn atap ótti. «Jubaıym Djıllmen birge múmkindik bolǵan taıaý ýaqytta Gavaııge saparlaımyz», - dedi ol. Alaıda, Baıden mamandarǵa órt sóndirýge kedergi keltirmeý úshin saparmen asyqpaıtynyn aıtqan.
Qyzyl jalyn Lahaına tarıhı qalasyn kúlge aınaldyrdy: 2200 ǵımarat, negizinen turǵyn úıler tolyqtaı janyp ketti nemese zaqymdaldy, 850 gektar jer órtendi. Tótenshe jaǵdaılar menedjmenti federaldy agenttigi Lahaınany qalpyna keltirýge 5,5 mlrd dollar qajettigin aıtty.
AQSh bıligi Maýı aralyndaǵy orman órti saldarynyń mundaı joıqyn bolýyna birneshe faktor, onyń ishinde kommýnıkatsııa júıesiniń irkilisi men saǵatyna 130 shaqyrymǵa jetetin kúshti jel sebep boldy dep esepteıdi.
Gýbernator Djosh Grın men Gavaı shtatynyń bas prokýrory Anne Lopez turǵyndar órt qaýpi týraly der kezinde eskertý alǵanyn nemese almaǵanyn tekseretinin málimdedi.
Reuters agenttiginiń habarlaýynsha, órt kezinde dabyl qaǵatyn sırenalar jumys istemegen. Uıaly baılanys pen elektr energııasyndaǵy irkilis te qaýipti ýaqytyly eskertýge kedergi keltirgen.
