Gavaı araldarynda janartaý atqylap, taǵy da evakýatsııa jarııalandy
ASTANA. QazAqparat - Bılik Amerıkadaǵy Gavaı araldarynyń (Gavaııa shtaty) soltústik bóligindegi Kılaýea janartaýynyń atqylaýyna baılanysty Lanıpýn eldi mekeniniń turǵyndaryn jedel kóshirý jóninde sheshim qabyldady, dep habarlaıdy TASS shtattyń tótenshe jaǵdaılar agenttigine silteme jasap.
«Biz Lanıpýn aýdanynda eki jańa janartaý jaryǵynyń paıda bolǵanyn rastaımyz. Bul jaryqtardan ýly gazdar shyǵyp jatyr. Lanıpýnnyń barlyq turǵyndary shuǵyl túrde úılerinen ketýi kerek», - dep eskertti agenttik óziniń Twitter-degi paraqshasynda. Vedomstvo deregi boıynsha, mundaı jaryqtardyń sany búginde 14-ke deıin ósken.
Aral bıligi lava aǵyndary baıqalǵan keıbir tasjoldardyń ýchaskelerin jabatynyn habarlady. Sondaı-aq, evakýatsııa kezinde úı janýarlaryn qaldyryp ketýge májbúr bolǵandardyń maldaryn qutqarý baǵytyndaǵy sharalar da qolǵa alynýda. Adamdar men úı janýarlaryna arnalǵan ýaqytsha ornalastyrý ortalyqtary jabdyqtandyrylýda, dep habarlaıdy Gavaı okrýginyń meri Gerrı Kım.
0,347 sharshy shaqyrymǵa jaıylǵan lava 35 úı-jaıdy joıdy. Budan buryn apat bolǵan aýmaqta 1,7 myń adam evakýatsııalanǵan bolatyn. Kılaýea janartaýy Gavaı araldaryndaǵy týrısterdiń eń kóp baratyn tanymal jeri. Osyǵan baılanysty shtat bıligi eskertý jarııalap, tabıǵı apat bolǵan aýmaqqa týrısterdiń jaqyndamaýyn suraıdy.
3 mamyrda Kılaýea janartaýynyń atqylaýymen qatar, qýaty 6,9 baldyq jer silkinisi boldy. Jerasty dúmpýiniń epıtsentri Havaııan-Peradaıs-Park (Pýna okrýgi) aýmaǵynan ońtústik-batysqa qaraı 25,5 shaqyrym jerde ornalasqan. Jer silkinisiniń oshaǵy 5 shaqyrym tereńdikte jatyr.
Foto: korrespondent.net
