Gavaı araldarynda janartaý atqylap, kúl shashyp jatyr
ASTANA. QazAqparat - Sársenbi kúni Gavaı araldarynyń shyǵys bóliginde Kılaýea janartaýynyń ózeginen qýatty kúl atqylaǵan, dep habarlaıdy TASS AQSh-tyń Geologııalyq qyzmetine silteme jasap.
Vedomstvonyń deregi boıynsha, kúl janartaý ózeginiń ishindegi taý jynystarynyń opyrylýy saldarynan atqylaǵan. Bul jer asty sýlaryna deıin kraterdegi lava deńgeıiniń tómendeýine baılanysty emes, delingen Geologııalyq qyzmettiń taratqan habarlamasynda.
Budan buryn vedomstvo aldaǵy aptada Kılaýeanyń taǵy da atqylaıtynyn málim etken bolatyn. Atalyp ótkendeı, janartaý kraterindegi lava deńgeıiniń turqty tómendeýi «aldaǵy aptada jarylyspen qatar júretin atqylaýǵa» ákelip soqtyrýy múmkin.
Shtattyń tótenshe jaǵdaılar agenttigi Lanıpýn aýdanynda eki jańa janartaý jaryǵynyń paıda bolǵanyn rastady. Bul jaryqtardan ýly gazdar shyǵyp jatyr. Onyń deregi boıynsha, mundaı jaryqtardyń sany 14-ke deıin ósken. Osyǵan baılanysty bılik jańa evakýatsııa jarııalady. 2 myńnan astam adam óz úılerin tastap ketýge májbúr boldy.
0,347 sharshy shaqyrymǵa jaıylǵan lava 35 úı-jaıdy joıdy. Derekter boıynsha, eshkim tabıǵı apattan zardap shekpegen.
3 mamyrda Kılaýea janartaýynyń atqylaýymen qatar, qýaty 6,9 baldyq jer silkinisi boldy. Jerasty dúmpýiniń epıtsentri Havaııan-Peradaıs-Park (Pýna okrýgi) aýmaǵynan ońtústik-batysqa qaraı 25,5 shaqyrym jerde ornalasqan. Jer silkinisiniń oshaǵy 5 shaqyrym tereńdikte jatyr.
