Gaýhar Aldambergenova: Joldaýdaǵy 10 negizgi mindet - jetistikke jetý jolyndaǵy mańyzdy qadam
«Memleket basshysy Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Qazaqstan halqyna arnaǵan Joldaýy jańa álemge hám Tórtinshi ónerkásiptik revolıýtsııa álemine beıimdelý men jetistikke jetý jolyn tabý úshin nendeı jumystar istelýi qajettigin aıqyndaý jolyndaǵy mańyzdy ári aıtýly qadam. Elbasy jarııalaǵan basymdyqtar men mindetter Qazaqstannyń áleýmettik-ekonomıkalyq jáne tehnologııalyq turǵyda jańǵyrtýdyń logıkalyq jalǵasy ispettes. Elimiz egemendik jyldarynda únemi jahandyq jańa úrdisterdi qoldap keledi. Maqsat - aıqyn. Halyqtyń ál-aýqaty men turmystyq áleýetin arttyrý», - dedi ol.
Ýnıversıtet basshysynyń aıtýynsha, adamı kapıtaldyń sapasyn arttyrý - memleket damýyn qamtamasyz etýdiń negizgi alǵysharty. Qoǵamnyń zııatkerlik áleýetin ilgeriletýdi júzege asyrý pedagog kadrlarǵa tikeleı baılanysty. Osy oraıda Elbasy Joldaýdyń jetinshi negizgi mindetinde bilim berý júıesiniń barlyq deńgeıi zaman shyndyǵy men ekonomıka suranystaryna jaýap berýi tıis ekendigin jáne bul arada muǵalim mamandyǵynyń bedelin arttyrý qajettigin alǵa tartty.
«Bul úshin ne isteý kerek? Birinshiden, otandyq joǵary oqý oryndary oı-órisi damyǵan, talantty, zerdeli jáne ultjandy ustaz daıyndaýdy odan ármen jańa deńgeıge kótere túsý qajet. Sebebi, jańa myńjyldyqta óz kásibiniń qyr-syryn jete meńgergen mamandardyń bási basym bolmaq. Buny ýaqyttyń ózi aıqyndap otyr. Osynaý aýqymdy jaýapkershilikti abyroımen atqarý pedagogtarǵa júktelgen mártebeli mindet. Damýdyń dańǵyl jolyna baǵyt alǵan bolashaǵy baıandy eldiń órisi qashanda bilikti de sanaly urpaǵymen keńeımek. Óskeleń jasty elimizdiń tutqasy, qatarynyń kóshbasshysy etip tárbıeleý - ǵasyrǵa jýyq úzdiksiz muǵalim mamandaryn daıarlap kele jatqan Qyzdar ýnıversıtetiniń basty baǵdary, negizgi mıssııasy. Ekinshiden, Prezıdent joǵary bilim berý isinde jasandy ıntellektpen jáne «úlken derektermen» jumys isteý úshin aqparattyq tehnologııalar boıynsha bilim alǵan túlekter sanyn kóbeıtý tıistigi jaıynda, oqytýshylardyń qaıta daıarlyqtan ótýine kúsh salyp, joǵary oqý oryndaryna sheteldik menedjerlerdi tartýdy aıtty. Sonymen qatar, qazaqstandyq joǵary oqý oryndary shetelderdiń jetekshi ýnıversıtetterimen, ǵylymı ortalyqtarymen, iri kásiporyndarymen jáne transulttyq korporatsııalarymen birlesken jobalardy belsendi túrde júzege asyrý qajettigin alǵa tartty. Bizdiń oıymyzsha, Elbasy júktegen mindetterdi joǵary dárejede oryndaý úshin muǵalimniń mártebesin kótere túsken abzal. Bul osy atalǵan mindetterdiń ornyqty iske asýyna uıytqy bolmaq. Sondaı-aq, pedagogtardyń kásibı biliktiligin zamanaýı tehnologııalar arqyly kóterýge de basty nazar aýdarǵan abzal», - dedi Gaýhar Aldambergenova.
Onyń paıymynsha, bilikti, bilimdi kadrlar daıarlaýda jáne tehnologııalyq damyǵan elderdegi ǵylymı jumystar júıesinde joǵary oqý oryndarynyń úlken mańyzdy ról atqarady. Bul turǵyda Qazaq memlekettik qyzdar pedagogıkalyq ýnıversıteti ǵylym men bilimdi ózara úılestirip, ǵylymı zertteý jumystaryn ǵylym men tehnologııanyń jańa nysandaryna baǵyttap júrgizýdi basty maqsat etip kele jatyr. Bilim men ǵylymdy damytý jáne qyzdarǵa pedagogıkalyq bilim berý, belsendi azamattyq ustanymy bar mamandar daıarlaý basty mıssııasy bolyp tabylatyn oqý ornynda ótkiziletin halyqaralyq deńgeıdegi ǵylymı konferentsııalar, júzege asyp jatqan túrli jobalar saladaǵy máselelerdi sheteldik áriptestermen birlese sheship, tájirıbe almasýǵa múmkindik beredi.
«Memleket basshysy usynǵan elimizdi tórtinshi ónerkásiptik revolıýtsııa jaǵdaıynda damytýǵa arnalǵan 10 negizgi mindet Qazaqstan damýynyń jańa baǵytyn kózdeıdi. Bul búgingideı almaǵaıyp ýaqytta qoǵamnyń múddesi men negizgi maqsatyn eskeretin strategııalyq turǵydan mańyzdy qujat. Sebebi, Joldaýda kórsetilgen basymdyqtar el damýy men turaqtylyǵyn qamtamasyz etetin uzaq merzimdi damý strategııasyna sáıkes keledi. Sonymen qatar, Joldaý Qazaqstannyń álemdegi tehnologııalyq, ekonomıkalyq jáne áleýmettik salalardaǵy tereń jáne qarqyndy ózgeristerge beıimdelýine sep bolady», - dep túıindedi sózin ýnıversıtet basshysy.
