Gaýhar Aldambergenova pedagog mártebesi týraly: Jańa Zań naqty isterge serpin beredi
«Memleket basshysy Qasym-Jomart Toqaev «Pedagog mártebesi týraly» Zańǵa qol qoıdy. Bul – qazaqstandyq ustazdar qaýymynyń qoǵamdaǵy bedelin arttyryp, ornyn aıshyqtaýǵa baǵyttalǵan zor qadam boldy. 21 baptan turatyn jańa Zań jarty mıllıonnan astam ustazdyń jumysyna qatysty. Onda tórt baǵyt qamtylǵan. Birinshiden, pedagogterdiń quqyqtaryn keńeıtý jáne ózine tán emes jumystardan bosatý, olardyń júktemesin azaıtý. Ekinshiden, muǵalimniń qyzmetine qoıylatyn talaptardy kúsheıtý. Úshinshiden, materıaldyq emes yntylandyrý tetikteri jáne tórtinshiden, materıaldy yntalandyrý qadamdary», - dep atap ótti Qyzdar ýnıversıtetiniń rektory.
Oqý ornynyń basshysynyń paıymdaýynsha, jańa zań kóptegen múmkindikterge jol ashyp, tyń serpin beredi.
«Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda áleýmettiń áleýetin arttyrý maqsatyndaǵy naqty iske asýy tıis mindetterdi belgilep bergen bolatyn. Elbasy jarııalaǵan mańyzdy qujatta «Pedagog mártebesi týraly» Zań qabyldaý qajettigi de aıtyldy. Osy oraıda Bilim jáne ǵylym mınıstrligi aýqymdy jumystar júrgizip, naqty ister atqardy», - deıdi Gaýhar Aldambergenova.
Elimizdegi ustazdar daıarlaıtyn irgeli bilim ordasynyń rektory jańa zańda qarastyrylǵan basymdyqtar men tetikter tóńireginde de atap ótti.
«Parlament Senatynyń jalpy otyrysynda zań jobasyn tanystyrǵan elimizdiń bas pedagogi Ashat Aımaǵambetov muǵalim mártebesin arttyrý onyń qyzmetine qoıylatyn talaptardy kúsheıtýdi qajet etetindigin erekshe atap ótken bolatyn. Bul oraıda jańa Zań ustazdardyń etıka máselelerine de jete kóńil bóledi. Oǵan sáıkes ár bilim mekemesinde ádep boıynsha keńester ınstıtýty engizilmek. Meniń oıymsha, bul bastama óz kezeginde bilikti de bilimdi, «ustaz» degen atqa laıyqty naǵyz mamandar mektebiniń qalyptasýyna negiz bolady. Sonymen qatar Prezıdent Qasym-Jomart Toqaevtyń byltyrǵy Tamyz konferentsııasynda bergen tapsyrmasynyń aıasynda aldaǵy tórt jyl ishinde muǵalimderdiń eńbekaqysy eki esege artady jáne bıyldan bastap pedagogterdiń jalaqysy 25 paıyzǵa ósedi dep kútilýde», - dedi G.Aldambergenova.
Onyń pikirinshe, jańa Zań muǵalim bedelin arttyrýmen qatar, pedagog kadrlaryn daıarlaıtyn oqý oryndarynyń da mańyzyn aıqyndaıdy.
«Elimizdegi eń irgeli joǵary oqý orny Qazaq ulttyq qyzdar pedagogıkalyq ýnıversıteti negizinen aýyldyq eldimekenderdegi bilim oshaqtary úshin maman daıarlaıdy. Óziniń 75 jyldyq tól tarıhynda oqý orny 60 myńnan astam pedagog daıyndady. Osy oraıda atap ótken jón, halyqtyń ómir súrý deńgeıi men sapasyn aıtarlyqtaı arttyrý jáne joǵary kásibı kadrlardy tıimdi molaıtýǵa baǵyttalǵan elimizde júrgizilip jatqan saıasat pedagog kadrlardy qalyptastyrý máselelerin týyndatýda. Bul másele qaı kezeńde de óte ózekti bolǵan. Máselen, búginde halyqtyń demografııalyq ósý jaǵdaıyna baılanysty mektepke deıingi jáne jalpy orta bilim mekemeleriniń turaqty ósýi baıqalyp otyr», – dedi óz sózinde ýnıversıtet rektory.
Onyń aıtýynsha, bilim berýdi, ǵylym men mádenıetti qalyptastyrýǵa yqpal etetin muǵalimniń kásipqoılyǵy men biliktiligine qoıylatyn talaptar kúsheıýde.
«Kadrlardy qalyptastyrýdyń taǵy bir máselesi – eńbekaqynyń tómendigi, pedagog kadrlardyń zeınetke deıingi jasy jáne beıindi biliminiń bolmaýy. Úshinshi másele, bilim berýdiń barlyq deńgeılerindegi oqytý baǵdarlamalarynyń bir-birinen alshaqtyǵy. Máselen, jalpy orta bilim berý mekemeleri jańartylǵan mazmun boıynsha bilim berýge kóshkende, mektepke deıingi bilim berý baǵdarlamasy aıtarlyqtaı ózgeristerge ushyraǵan joq. Qazaq ulttyq qyzdar pedagogıkalyq ýnıversıtetiniń basty qyzmetiniń biri – joǵaryda atalǵan máselelerdi ońtaıly sheshý. Búginde oqý ornynda osy tarapta birqatar naqty ister júzege asyrylýda. Ujymnyń professor-oqytýshylary óz qyzmetinde bolashaq pedagogterdiń kásibı beıimdelýi úshin pedagogıkalyq kadrlardy daıarlaýdyń bilim berý baǵdarlamalaryn tájirıbege baǵyttaý negizinde júrgizedi», – dedi ýnıversıtet rektory.
Gaýhar Aldambergenova qoǵamnyń talqylaýynan ótip, pedagog qaýymynyń usynystary negizinde muqııat daıarlanǵan jańa zań muǵalim mártebesiniń qoǵamdaǵy bedelin shynaıy kóteredi degen senimde. Onyń pikirinshe, ustazdyń bedeldi – qoǵamnyń bedeli, memleket bolashaǵynyń naqty kepili.
