Ǵasyrlyq qadamyn búginnen oılaıtyn el teatr salady - Elbasy
ASTANA. 21 maýsym. QazAqparat - Ǵasyrlyq qadamyn búginnen oılaıtyn el teatr salady. Búgin elordada «Astana-Opera» Memlekettik opera jáne balet teatrynyń ashylýy barysynda sóz sóılegen Memleket basshysy Nursultan Nazarbaev osylaı málimdedi.
«Qazaqstanda basqa memleketterge qaraǵanda úlken basymdyq, kóptegen elderde joq áleýet bar. Biz jańa memleketpiz, Astana - jańa qala. Endeshe, álemniń túkpir-túkpirinde bizdiń mádenıetimiz ben dástúrimizben tanysqysy keletin, muny kózderimen kórgisi keletin mıllıondaǵan adamdardyń bolatyny zańdy nárse. Biz osy basymdyqty paıdalanýǵa tıispiz», - dedi N. Nazarbaev.
Elbasynyń aıtýynsha, kásiporyn quryp, zaýytty iske qosyp, jol salatyn memleket aldaǵy jyldary úshin myǵym irgetas qalaıdy. Mektep pen aýrýhana salatyn memleket ol ultynyń aldaǵy onjyldyǵyn qamtamasyz etken bolady. «Al teatrlar salatyn memleket - aldaǵy ǵasyrlarǵa kóz júgirtken bolady», - dep atap ótti N. Nazarbaev.
Sonymen birge, Elbasy endi sanaýly kúnderden soń ǵajaıyp Astana óziniń 15 jyldyǵyn atap ótetinine toqtaldy. «Búgingi kúni men basty máseleni aıtqym keledi, biz óz Otanymyzdyń bas qalasyn ǵana emes, tutastaı aýqymdy qalany ajarlandyrdyq. Búgingi kúni barlyq Qazaqstandaǵy sekildi 100-den astam etnos Astanada ómir súrip jatyr. Astana - bul kúndelikti qonys toıy ótetin, kúndelikti toı toılanyp, jańa taǵdyrlar toǵysyp jatatyn qala. Beıbitshilik pen kelisim - bul Astana men Qazaqstannyń berik negizi. Qazaqstandyqtardyń eńbegi men shyǵarmashylyq kúsh-qýatynyń arqasynda bizdiń qalamyz jyl saıyn jańǵyryp, jańara túsýde. Sondyqtan da, barshańyzdy Astanadaǵy jańa óner hramynyń ashylýymen quttyqtaımyn», - dedi Nursultan Nazarbaev.
