Ǵasyrlar jasaǵan álemdegi 3 aǵashtyń biri Jetisýda ornalasqan
ALMATY OBLYSY. QazAqparat - Almaty oblysynda BAQ ókilderi men blogerlerge óńirdiń kıeli jerleri boıynsha press-týr uıymdastyryldy. Astana men Almaty jáne Jetisý óńirinen jınalǵan qonaqtar saparyn Panfılov aýdanyndaǵy Kıeli aǵashtan bastady, dep habarlaıdy QazAqparat tilshisi.
Kelýshilerge kıeli aǵashtyń ańyzyn shyraqshy Raıa Nurjaparqyzy aıtyp berdi. Osy aǵashtyń basynda 20 jylǵa jýyq ýaqyt turyp jatqan shyraqshynyń sózinshe, Kıeli aǵashtyń 7 ǵasyrlyq tarıhy bar.
«Mundaı aǵash álem boıynsha tek úsh elde ǵana bar. Biri Túrkııada, ekinshisi Qytaıda jáne úshinshisi osy, bizdiń Almaty oblysynyń Panfılov aýdanyna qarasty Úlken aǵash aýyldyq okrýginiń Áýlıeaǵash aýylynda. Kıeli aǵash qasıettiligimen de qudirettiligimen de kelýshilerdi tańǵaldyrýda. Bul jerge týrıster álemniń túkpir-túkpirinen keledi. Kelýshilerdiń basym bóligi munda perzent surap, baq surap keledi. Basynda túneıdi. Tilekteri qabyl bolyp jatady», - deıdi Raıa Nurjaparqyzy.
Sondaı-aq, shyraqshy bul aǵashtyń ańyzyna da toqtaldy. Aıtýynsha, Qytaı elinen qajylyqqa jaıaý jol tartqan jeti áýlıe osy jerde aıaldap, túnegen.
«Jeti áýlıeniń ishindegi Shamashuryp baba asa taıaǵyn shanshyp qoıyp demalǵan, al tań sáride aǵashtyń kóktegenin kórgen.
Asa taıaqtan kóktep shyqqan aǵashqa jeti adamnyń qulashy áreń jetedi. Alyp aǵashtyń jeti butaǵy bolǵan. Qazir ol butaǵynyń úsheýi bar. Tórteýi synyp qaldy. 1962 jyldary alyp aǵashtyń tamyrynan óskinder kóktep shyqqan. Bul jerde aǵashtyń tamyrynan sý shyǵady. Ol sýdyń emdik qasıeti bar. Bul jerde biz bir aǵashty perzent aǵashy dep atap kettik. Sebebi, bala súıe almaı júrgen jandar sol aǵash ortasynan ótse, balaly bolyp jatady», - deıdi shyraqshy.
Aıta ketý kerek, press-týr eki kúnge jalǵasady. Osy ýaqyt aralyǵynda BAQ ókilderi men blogerler Jetisý jeriniń ózge de kórikti jerlerimen tanysady.
