Ǵasyr jasaǵan qarııaǵa aýyldastary at mingizip, shapan japty
JARKENT. QazAqparat – Іrgesinde jeti ǵasyrdan astam ýaqyt jaıqalyp kıeli aǵash ósip turǵan Almaty oblysy járkent qalasy mańyndaǵy Áýlıeaǵash aýylynda júz jasqa kelgen aqsaqal turady, dep habarlaıdy QazAqparat tilshisi.
Bir ǵasyr jasaǵan aqsaqaldyń esimi - Turaǵaldy Jaqsylyquly. Jut jyldary aýyldastarymen birge shekara asyp, aýyp ketken Qytaı jerinen tarıhı Otanyna 1955 jyly oralǵan. Sodan 1983 jyly qurmetti eńbek demalysyna shyqqansha osy aýylda taban aýdarmaı ǵumyr keship, mal baqqan. Aýyl sharýashylyǵynda qajyrlylyqpen etken jemisti eńbegi úshin osyndaǵy Lenın atyndaǵy sovhozdyń ákimshiligi tarapynan talaı ret moraldyq jáne materıaldyq yntalandyrý syılyqtaryna ıe bolǵan. Ata kásiptiń qyr-syryn jetik biletin qaıratty qarııa zeınetke shyqqan soń da sońǵy jyldarǵa deıin attan túspeı, balalarynyń qat-qabat sharýasyna bas-kóz bolyp kelgen.
Turaǵaldy aqsaqal 2012 jyly ómirden ótken jubaıy Sholpan ájeımen bir shańyraq astynda 67 jyl otasqan. Ekeýi 12 ul-qyz ósirip, olardan 36 nemere, 67 shóbere, 3 shópshek órbitken. Balalarynyń aldynyń ózi aq saqaldy, aq samaıly áje atanyp, odan keıingileri de qoǵamymyzǵa laıyq azamattar bolyp ósip, ómirden óz oryndaryn tapqan. Olardyń arasynda ortanshy uldarynyń biri Igenbaı uzaq jyldar boıy jergilikti basqarý organdarynda qajyrly qyzmet etip, aýyl ákimi boldy.
Áýlıeaǵash aýylynyń jurtshylyǵy taıaýda júz jasaǵan Turaǵaldy qarııanyń mereıtoıyn úlken qýanyshpen atap ótti.
Úlkenaǵash aýyldyq okrýginiń ákimi Ermek Erkinuly Nurahmetov okrýg turǵyndary atynan aqsaqalǵa arnaıy quttyqtaý tapsyryp, shapan japty. Aýyldastary at mingizip, kóptegen syı-sııapat jasady. Toı sońynda Turaǵaldy aqsaqal el-jurttyń amandyǵyn tilep, aq batasyn berdi.
