Ǵasyrdan asqan Túrkistan vokzalyna ǵylymı restavratsııa jasalady
TÚRKІSTAN. KAZINFORM — Qasıetti shahardyń tarıhı nysandarynyń biri sanalatyn temirjol vokzaly búginde aıtarlyqtaı tozǵan. 2000 jyly kúrdeli jóndeýden ótken ǵımaratta sodan beri esik-terezeler jańarmaǵan.
1904 jyldan beri qyzmet kórsetip kele jatqan Túrkistan temirjol vokzalyna ǵylymı restavratsııa júrgiziledi. Jańǵyrtý jumystary kelesi aıda bastalmaq.
Vokzal bastyǵy Marat Mırzakýlovtyń aıtýynsha, 2022 jyly júrgizilgen jumystar barysynda tek ishki eden jabyndary men peron joldarynyń brýschatkalary ǵana aýystyrylǵan.
Aldaǵy restavratsııa «Qazaqstan temir joly» ulttyq kompanııasynyń qarjysy esebinen júzege asady. Jobany «Qazqaıtajańartý» mekemesi atqarady.
— Túrkistan temirjol vokzaly — tek kólik nysany ǵana emes, shahardyń tarıhı eskertkishi. Ǵylymı-jobalyq qujattamaǵa sáıkes, uzaq jyldar boıy restavratsııa jasalmaǵan vokzaldyń tarıhı, sáýlettik-kórkemdik kelbeti áýelgi qalpyna keltiriledi. Jumystar jolaýshylar qozǵalysyna kedergi keltirmeı, barlyq qaýipsizdik talaptaryn saqtaı otyryp júrgiziledi, — dedi «Qazqaıtańjańartý» RMK bas dırektory Oljas Sharııazdanov.
Qazirgi tańda 120 jyldan astam tarıhy bar vokzaldan 17 qalaralyq jáne 3 halyqaralyq baǵytta poıyz qatynaıdy.
Budan buryn Astana-1 vokzalynyń jańa bóliginiń rekonstrýktsııasy qazannyń sońyna deıin aıaqtalatynyn jazǵan edik.
