Ǵasyrdan asqan ardager óz tańdaýyn jasady
AQTÓBE. KAZINFORM — Ǵasyrdan asqan ardager Vasılıı Gretskıı Jańa Ata Zańǵa baılanysty ótken respýblıkalyq referendýmde óz tańdaýyn jasady.
Ol 1924 jyly Belorýssııanyń Vıtebsk oblysyndaǵy Polotsk qalasynda kópbalaly otbasynda dúnıege kelgen. Qazirgi ýaqytta Hromtaý qalasynda turady. Aqtóbe oblysy boıynsha soǵystyń sońǵy soldaty. Uzaq ǵumyrynda talaı tarıhı kezeńderdiń kýási bolǵan ardager el ómirindegi mańyzdy saıası naýqannan tys qalǵan joq.
Referendým kúni saılaý komıssııasynyń músheleri ardagerdiń úıine arnaıy baryp, daýys berý rásimin uıymdastyrdy. Vasılıı Gretskıı bıýlleten alyp, óz tańdaýyn jasap, jáshikke saldy.
Daýys berý kezinde barlyq talap tolyq saqtalyp, qajetti rásimder zańǵa sáıkes júrgizildi. Osyndaı mańyzdy kúni ǵasyr jasaǵan jaýyngerdiń belsendilik tanytýy kópshilikke úlgi boldy.