Ǵasyr mámilesi: EO men Úndistan tarıhı saýda kelisimin jasasty

ASTANA. KAZINFORM — Shamamen jıyrma jylǵa sozylǵan kúrdeli kelissózderden keıin Úndistan men Eýropalyq odaq Erkin saýda týraly kelisim (FTA) boıynsha jumystyń aıaqtalǵanyn resmı túrde jarııalady. Bul týraly Kazinform agenttiginiń menshikti tilshisi habarlaıdy.

Qujatqa 27 qańtarda Delıde Eýroodaq basshylary — Eýropalyq komıssııa tóraǵasy Ýrsýla fon der Lıaıen men Eýropalyq keńes tóraǵasy Antonıý Koshtanyń sapary barysynda qol qoıyldy.

Atalǵan kelisim álemdegi eń iri erkin saýda aımaqtarynyń birin qalyptastyrady. Bul aımaq shamamen 2 mıllıard halqy bar naryqty qamtıdy.

Eýropalyq sarapshylar EO men Úndistan arasyndaǵy bul kelisimdi «ǵasyr mámilesi» dep atap otyr. Taraptardyń resmı málimdemesine sáıkes, taýarlardyń barlyq sanattarynyń 96%-y boıynsha kedendik baj salyǵy tolyq joıylady nemese edáýir tómendetiledi.

Eýropalyq óndirýshiler úshin bul buryn jabyq bolyp kelgen Úndistan naryǵyna kópten kútken qoljetimdilikti bildiredi. Atap aıtqanda, eýropalyq avtokólikterge salynatyn baj salyǵy, buryn 110%-ǵa deıin jetken bolsa, aldaǵy jyldary 10%-ǵa deıin tómendeıdi. Al Úndistan óz kezeginde toqyma buıymdary, farmatsevtıkalyq ónimder jáne aýyl sharýashylyǵy taýarlary úshin EO-nyń 27 eliniń naryǵyna is júzinde kedergisiz qol jetkizedi.

Kelisimdi qatysýshy elderdiń parlamentterinde ratıfıkatsııalaý úderisi aldaǵy aılarda bastalady. Mámile osy jyldyń sońyna deıin tolyq kúshine enedi dep kútilip otyr.

Ekonomısterdiń boljamynsha, EO men Úndistan arasyndaǵy FTA kelisimin iske asyrý taraptar arasyndaǵy ózara taýar aınalymyn alǵashqy úsh jyl ishinde 30-40%-ǵa arttyrýǵa múmkindik beredi.

Buǵan deıin Kazinform Úndistannyń álemdegi tórtinshi ekonomıkaǵa aınalyp, ósim qarqyny boıynsha G7 elderiniń kópshiligin basyp ozǵanyn habarlaǵan.

Eske sala ketsek, BAÁ men Úndistan elimizden halal et ónimderin alǵysy keletinin jazdyq.