Ǵasyr qupııasy: Florentsııalyq almaz Kanadadan tabyldy
ASTANA. KAZINFORM – Bir ǵasyrǵa jýyq ýaqyt boıy joǵaldy dep eseptelgen florentsııalyq almaz tabyldy, dep habarlaıdy Only Natural Diamonds.
Qundy tas buryn Medıchı men Gabsbýrgter áýletterine tıesili bolǵan. Jyldar boıy ol Kanadanyń banktik seıfinde saqtalyp kelgen.
Salmaǵy 137,27 karat bolatyn florentsııalyq almaz — 126 qyrly qos roza pishindi erekshe óńdelgen, Golkonda aımaǵynan shyqqan sırek tastardyń biri. Bul óńir ejelden Úndistandaǵy asyl tastardy óndirý ortalyǵy sanalǵan.
Almazdyń alǵashqy ıesi — XVII ǵasyrdyń ortasynda ony ıelengen gertsog Ferdınando II de’ Medıchı. Keıin Medıchıler áýleti tarıh sahnasynan ketken soń, tas Gabsbýrgter ıeligine ótip, ımperatorlyq bıliktiń sımvolyna aınaldy. 1745 jyly ol ımperator Marııa Terezııanyń jubaıy, Avstrııa áýletiniń negizin qalaýshy Frants Stefan Lotarıngskııdiń tájin bezendirgen.
Birinshi dúnıejúzilik soǵystyń sońynda Avstro-Vengrııa ımperııasy ydyraǵan kezde ımperator Karl I zergerlik buıymdardy Vena qalasynan Shveıtsarııaǵa jasyryn túrde jóneltýge buıryq beredi. Bir jyldan keıin ol iz-túzsiz joǵalyp ketedi. Uzaq jyldar boıy túrli nusqalar aıtyldy, urlandy, qara naryqta satytylyp ketti degen sııaqty boljamdar aıtyldy.
Alaıda shyndyq áldeqaıda qarapaıym bolyp shyqqan. Karl I qaıtys bolǵannan keıin onyń jubaıy Zıta áýlet áshekeılerin Kanadanyń Kvebek qalasyndaǵy bankke jasyrǵan. Bul qupııany tek onyń eki uly ǵana bilgen jáne olar ımperatordyń óliminen keıin týra júz jyl boıy bul syrdy ashpaýǵa ant bergen.
2025 jyldyń kúzinde Gabsbýrgterdiń urpaqtary otbasy ańyzdarynda ǵana atalyp kelgen sol seıfti ashqan. Іshinen birneshe tarıhı jádigermen birge ımperatorlyq tájdi bezendirgen jarqyraǵan sary tasty tapqan.
Almazdyń túpnusqa ekenin Vena zergeri, áıgili ımperator saraıyn qamtamasyz etken A.E. Köchert úıiniń ókili Krıstof Kehert rastady. Sarapshylar bul tabysty zamanaýı zergerlik ǵylym tarıhyndaǵy eń mańyzdy jańalyqtardyń biri dep baǵalady.
Buǵan deıin habarlanǵandaı, Lývr murajaıynan Napoleon men ımperatorǵa tıesili toǵyz zergerlik buıym — alqa, táj jáne basqa da zattar urlanǵan bolatyn. Keıin belgili bolǵandaı, urlanǵan áshekeıler saqtandyrylmaǵan bolyp shyqqan.