«Ǵasyr alaıaǵy» Ulybrıtanııa sotynda óz kinásin moıyndady

ASTANA. KAZINFORM – Ulybrıtanııada bıtkoınderdi jylystady degen kúdikke ilingen 47 jastaǵy qytaılyq Chjımıın Tsıan tarıhtaǵy eń iri alaıaqtyq tergeýiniń bóligi aıasynda óz kinásin moıyndady, dep habarlaıdy Euronews. 

Tergeý málimetinshe, Chjımın Tsıan 2014-2017 jyldary Qytaıda iri kólemdegi alaıaqtyq uıymdastyryp, óziniń Tianjin Lantian Gerui Electronic Technology kompanııasynyń 128 myńnan astam salymshysyn aldaǵan. Ol jábirlenýshilerge tabystyń 300%-yn qaıtarýǵa ýáde berip, urlanǵan qarajatty bıtkoınge aınaldyrdy.

Sodan keıin Tsıan elden ketip, Ulybrıtanııaǵa kirdi, ol jerden tańdaýly jyljymaıtyn múlik satyp aldy. 

Brıtan polıtsııasy áıelden shamamen 7 mlrd dollar kóleminde rekordtyq krıptovalıýtany tárkiledi. Bul – álemdegi eń iri tárkileý oqıǵalarynyń biri. 

Tsıannyń kinásin moıyndaýy brıtandyq quqyq qorǵaýshylardyń qytaılyq áriptesterimen birlesip júrgizgen aqshany jylystatýdyń jahandyq shemasyna qatysty jeti jylǵa jýyq tergeýdi aıaqtady. 

Ótken jyly onyń sybaılasy osy is boıynsha alty jylǵa bas bostandyǵynan sottaldy, al Tsıannyń ózine úkim jaqyn arada shyǵarylady. 

Tergeý anyqtaǵandaı, Tsıan óziniń jeke kúndeliginde «qudaı ana» jáne «hanshaıym» bolýdy armandaǵanyn jazǵan.

Bul atyshýly iske degen qyzyǵýshylyq alaıaqtan tárkilengen qarjynyń bolashaǵyna qatysty daý-damaıdan týyndap otyr. Ulybrıtanııa tárkilengen aktıvterdi bıýdjet tapshylyǵyn jabý úshin qaldyrýdy kózdese, kóptegen qytaılyq jábirlenýshiler aqshalaryn qaıtarýdy talap etip otyr. 

Buǵan deıin QHR burynǵy aýyl sharýashylyǵy jáne aýyl isteri mınıstri Tan Jentszıan asa iri kólemde para alǵany úshin ólim jazasyna kesilgenin jazǵan bolatynbyz. 

Al Kongonyń eks-prezıdenti Jozef Kabıla syrttaı ólim jazasyna kesildi.

 Kabıla áskerı qylmys, memleketke opasyzdyq jáne adamzatqa qarsy qylmys jasaǵany úshin kináli dep tanyldy.