Ǵashyqtar kúninde rektor Aqylbek Kúrishbaev alǵashqy mahabbatyn eske aldy
ASTANA. 15 sáýir. QazAqparat - Keshe keshqurym S.Seıfýllın atyndaǵy Qazaq agrotehnıkalyq ýnıversıtetiniń aldyndaǵy alańda 15 sáýir - Qozy Kórpesh pen Baıan sulý kúnine arnalǵan merekelik kesh ótti.
Alańǵa jınalǵan 2 myńǵa jýyq jasty quttyqtaýǵa kelgen atalmysh JOO rektory Aqylbek Kúrishbaev, aqtaryla sóılep, alǵashqy jáne sońǵy - ekinshi mahabbatyn eske aldy.
«Bizdiń ýnıversıtettiń jastary, stýdentteri Qazaq eline mura bolatyn úlken salt-dástúrlerdi jańǵyrtyp, nasıhattaý jolynda júr. Bul - úlken maǵynasy bar, ult jastaryna rýh, patrıottyq sezim beretin eńbek. Senderdi biz maqtan etemiz. Búgin biz Qyz Jibek pen Tólegendi, Qozy Kórpesh pen Baıan sulýdy eske alyp, mahabbat kúnin atap ótemiz. Ǵashyqtar kúni qutty bolsyn, qurmetti, stýdentter»,- dep tilegin jetkizdi ol.
Odan ári, A. Kúrishbaev stýdentterdiń suraýy boıynsha jalyndaǵan jastyq shaǵynda júregin jaýlaǵan arýlardy eske túsirdi.
«Mahabbat sezimi alǵash ret segizinshi synypta keldi. Ol kezde aýylda turamyz. Bir kúnderi aýylymyzǵa Almatydan, bizge kórshi bolyp mekteptiń oqý isiniń meńgerýshisi kóship keldi. Sonyń qyzyn unatyp, qaldym. Talaı jyldar boıy onyń sómkesin tasyp, talaı ulmen tóbeleskenmin», - dep baıandady ol.
Al ekinshi mahabbat rektor myrzaǵa 20 jasynda, úshinshi kýrsta oqyp júrgen kezinde kelgen eken.
«Bir kúni ekonomfaktyń qyzdaryna bardyq. Ol kezde búgingideı «Qyz syny» emes, «A ný-ka, devýshkı!» degen baıqaý bolatyn. Osy baıqaýda jeńiske jetken ekonomıkalyq fakýltette oqıtyn arýdy unatyp qaldym. Aqyrynda, sol qyzǵa úılendim. Úıdegi jeńgelerińizben otaýlasqanymyzǵa bıyl buıyrtsa otyz jyl bolady», - dep ashyǵynan áńgimeledi oqý ornynyń basshysy.
