«Ǵashyqtar kúni sáýirge aýystyryldy» - Respýblıkalyq basylymdarǵa sholý
***
«Egemen Qazaqstan» basylymynyń búgingi sanynda Senat depýtaty Qýanysh Aıtahanovtyń «Bolashaq óz qolymyzda» atty maqalasy jarııalandy. Maqalada Elbasynyń bıylǵy Joldaýynda kóterilgen máselelerge tereń taldaý jasalynǵan. «Elbasynyń til týraly nyqtap aıtqan tapsyrmalary ártúrli deńgeıdegi sheneýnikter tarapynan tolyq iske asyrylmaı otyrǵanyn da aıta ketýimiz kerek. Aldaǵy kezde, Elbasy bekitken memlekettik til baǵdarlamasyn múltiksiz oryndaý árbir qazaqstandyqtyń birinshi kezektegi mindeti ekendigin túsinetin ýaqyt jetti. Osy jerde Bilim jáne ǵylym mınıstrligine aıtatyn usynys bar. Ol orys tilinde mektep bitirýshi oqýshylardyń qazaq tilinen tapsyrǵan test synaǵy biryńǵaı test qorytyndysynda esepke alynatyn bolsa, qazaq tiline degen qajettilik týyndap, memlekettik tildi oqýshylar tereńdetip oqyp, tez bilip shyǵar edi. Bul - mınıstrlik quzyrynda sheshiletin másele», - delingen maqalada.
Sondaı-aq atalmysh basylymnyń búgingi sanynda «Mektep Mirjaqyp atyn aldy» degen taqyryppen maqala basyldy. Maqalada jýyrda Pavlodar oblysy ákiminiń orynbasary Álııa Ǵalymova basqaratyn oblystyq onomastıkalyq komıssııanyń otyrysy ótkendigi, sol otyrysta aýdan ortalyǵyndaǵy Jelezınka qazaq orta mektebine ultymyzdyń birtýar azamaty, halqyna «Oıan, qazaq!», dep oı salǵan, bıyl týǵanyna 125 jyl tolatyn Mirjaqyp Dýlatulynyń esimin berý jónindegi usynys biraýyzdan qoldaý tapqany jazylǵan. «Sondyqtan, mektep ujymy, oqýshylar endi bul usynystyń joǵarydan bekitilýin asyǵa kútýde», - delingen maqalada.
***
«Úkimet turǵyn úı qurylysyn qoldaýdyń memlekettik baǵdarlamasyn ázirledi». «Aıqyn» gazetiniń búgingi sanynda osyndaı taqyryppen jaryq kórgen maqalaǵa keshegi ótken Úkimet otyrysynda kóterilgen máseleler arqaý bolǵan. «Mınıstrler kabıneti óziniń keshegi jıynynda Eńbekpen qamtýdyń jańa baǵdarlamasyn qabyldady. Elbasynyń «Qazaqstandyqtardyń baspana jáne turmystyq jaǵdaılaryn jaqsartý» mindeti aıasynda osy kúni Úkimet turǵyn úı qurylysyn qoldaýdyń memlekettik baǵdarlamasyn ázirledi. El Úkimeti osy otyrysynda, jańa turǵyn úı baǵdarlamasy boıynsha, qoljetimdi baspananyń baǵasyn 1 sharshy metri úshin 170 myń teńgege deıingi deńgeıde bekitti. Sharshy metr quny ár óńirdiń óz ereksheligine qaraı, osy baǵa aıasynda qubylyp otyratyn bolady. Osyndaı talap álgi baǵdarlamanyń «Turǵyn úı qurylysyn qoldaý sharalary týraly» dep atalatyn ekinshi baǵytynda belgilenip otyr»,-delingen maqalada.
Sondaı-aq atalmysh basylymnyń jazýynsha, «Áýlıe Valentın kúni» dep katolıkter 14 aqpanda atap ótetin ǵashyqtar kúnin almatylyqtar 15 sáýirge shegerdi. Bul týraly Almaty qalalyq bilim berý basqarmasynyń janyndaǵy tárbıe jumysy jónindegi bólimniń bastyǵy Qatıpa Moldabaeva málimdedi. «Qańtar aıynda Almaty qalasy ákimdiginiń mádenıet, jastar saıasaty máseleleri jónindegi jáne baspasóz qyzmeti alda jasalatyn sharalardyń josparyn bekitti. Osy qujattyń 7 bólimine sáıkes, «Ulttyq ǵashyqtar kúni» 15 sáýirde keń kólemde atalyp ótiletin boldy. Osy qujatqa jáne jasóspirimderdi burys tárbıege baǵyttaıtyn bul merekege qarsylyq bildirgen ata-analardan kelip túsken kóptegen shaǵymdarǵa baılanysty bıyl Áýlıe Valentın kúni qala mektepterinde eskerýsiz qaldy. Sonymen qatar «Bolashaq» qozǵalysy 11 aqpan kúni «Valentın kúni» atap ótýge qarsy sharalar uıymdastyrdy»,-delingen maqalada. Maqala «Ǵashyqtar kúni sáýirge aýystyryldy» degen taqyryppen basylǵan.
***
«Alash aınasy» basylymynyń búgingi sanynda «Bergen baspanada bereke bolmady» atty problemalyq maqala jarııalandy. «Qazir Uly Otan soǵysy kezinde erlik kórsetip, eline aman oralǵandardyń qatary da sırep barady. Kózi tirilerin tipti saýsaqpen sanarlyq desek te bolady. Olardyń búgingi jaǵdaıy qalaı? Sanaly ǵumyrynda taǵdyrdyń taýqymetin tartqan asyldyń synyqtary endigi qalǵan sanaýly ǵumyrlaryn qalaı ótkizip jatyr? Bir ǵana mysal, Semeıde byltyr Jeńis kúni qarsańynda qalanyń Energetık kentinen ardagerler qurmetine dep páter kiltteri tabys etildi. Jańa baspana alǵan aqsaqaldar qýanyshynda shek bolmady. Ardagerler arasynda tipti jasy 100-den asqandary da bar edi. Ómirleriniń sońynda «basy bútin baspana aldyq» dep bórikterin kókke atqan aǵaıyn, qys qylań bergende kózderine jas aldy. Óıtkeni qurmettep bergen úı qarttarǵa pana bolmaı otyr»,-delingen maqalada.
Atalmysh basylymda «Importty óbekteýdiń qajeti joq» degen taqyryppen maqala basyldy. «Atameken» odaǵy» ulttyq ekonomıkalyq palatasynyń tóraǵasy Azat Perýashevtiń aıtýynsha, kásipkerliktiń jolbasshysy sanalatyn «Bıznestiń jol kartasy - 2020» baǵdarlamasynyń saýda sektoryna qatysty bóligine kóp kidirtpeı ózgerister engizý kerek jáne bolashaqta saýda kásiporyndaryna memlekettik qoldaý kórsetýdi shekteý kerek. «Atap aıtar bolsaq, «Bıznestiń jol kartasy -2020» baǵdarlamasynyń sheńberinde saýda salasyndaǵy saýda ortalyqtaryna, dúkender júıesine tek ınfraqurylymdy qurylystar salýda ǵana memlekettik qoldaý kórsetken abzal. Al memlekettik baǵdarlama aıasynda saýdadaǵy aınalym operatsııalaryn qarjylandyrýǵa túbegeıli tyıym salý kerek», - deıdi A. Perýashev.
***
«Kazahstanskaıa pravda» basylymynyń jazýynsha, keshe «Astana qalasy bas josparynyń ǵylymı-zertteý jobalaý ınstıtýty» memlekettik qazynalyq kásiporny «Nur Otan» Halyqtyq-demokratııalyq partııasy men memlekettik organdardyń jáne úkimettik emes uıymdardyń, sondaı-aq ekologııalyq jáne sanıtarlyq-epıdemıologııalyq qyzmet salasy ókilderiniń qatysýymen qoǵamdyq tyńdaý ótkizdi. Onda atap kórsetilgenindeı, aldyǵa qoıylǵan mindetterge sáıkes endi bir 20 jyldan soń astanamyz adam tanyǵysyz ózgeredi. Elorda budan ári qulpyryp, jasyl jelekke bólenip, taza ári turǵyndarǵa barlyq qolaıly jaǵdaılar týǵyzatyndaı bolady. Al qalanyń turǵyndary 1 mıllıon 200 myńǵa jetedi. Turǵyndar bolashaqta esh qınalmastan arnaıy qala mańyndaǵy aımaqtarǵa baryp demalatyn bolady. Bul másele jóninde tolyǵyraq bilgińiz kelse, basylymynyń búgingi sanyndaǵy «Astana kak gostıa ız býdýşego» degen maqalaǵa zer salyńyz.
