Ǵaryshtyq zertteýlerde joǵary oqý oryndarynyń múmkindikterin paıdalaný kerek - akademık S. Aısaǵalıev
ALMATY. Aqpannyń 12-si. QazAqparat /Erlik Erjanuly/ - Ǵaryshtyq zertteýlerde úlken nátıjege qol jetkizý úshin uıymdastyrý máselesin sheshý kerek.
Bul jaıly búgin Almatyda ótip jatqan ǵaryshtyq júıeler men keshender jasaý jobalaryn ǵylymı-tehnologııalyq qamtamasyz etý týraly semınar-dóńgelek ústel jıynynda aıtyldy, dep habarlaıdy QazAqparat.
"Respýblıkadaǵy ǵarysh salasynda isteıtin barlyq ǵalymdardyń basyn qosyp, atqarylatyn jumysty ózara bólý kerek. Kim nemen aınalysatynyn, qaısysy naqty, qaısysy qoldanbaly zertteýlerge jatatynyn, qaısysy júzege asyrylýy tıistigin anyqtaý qajet. Bizde jaqsy joǵary oqý oryndary bar. Respýblıka úshin, búkil halyq úshin jasalatyn bolǵan soń solardy durys paıdalaný kerek", deıdi QR Eńbek sińirgen ǵylym qaıratkeri, akademık Serikbaı Aısaǵalıev. QazUÝ professorynyń aıtýynsha, adamnyń qolymen jasalǵan isti basqa adam da isteı alady. Ǵaryshty zertteý salasynda bári birden jasalmaıdy. Oǵan ýaqyt kerek. Uıymdastyrý máselesin durys sheshý arqyly ǵana naqty nátıjege qol jetkizýge bolady. Ózge elderdiń bul salada 50, 100 jyldyq tájirıbesi bar. Al Qazaqstanda bul jumys táýelsizdik alǵannan keıin ǵana qarqyndy damı bastady. Sondyqtan bizdiń bolashaqqa degen úmitimiz óte zor.
