Ǵaryshtyq monıtorıngtiń arqasynda órt oshaqtaryn der kezinde anyqtaýǵa múmkin bolyp otyr - QR TJM
ASTANA. QazAqparat - Jerdi qashyqtyqtan zondtaý ádisimen tabıǵı órtterdi bastapqy kezeńinde anyqtaý júıesi damytylýda.
Bul týraly búgin Astanada ótken brıfıngte QR TJM Órtke qarsy qyzmet komıteti Memlekettik órt baqylaý jáne anyqtaý basqarmasynyń basshysy Meırambek Qaısanov málim etti.
«Jerdi qashyqtyqtan zondtaý ádisin paıdalana otyryp, tabıǵı órtterdi bastapqy kezeńinde anyqtaý júıesi damytylýda. Sáýir aıynan bastap QR TJM-niń «Qazaqstan ǵarysh sapary» ulttyq kompanııasymen kelisimi aıasynda kún saıyn Respýblıkalyq daǵdarys ortalyǵyna elimizdiń barlyq aýmaǵyn qamtıtyn termıkalyq núkteler boıynsha jerdi qashyqtyqtan zondtaýdyń 2-3 sýretteri kelip túsedi»,-dedi ol.
Onyń sózine qaraǵanda, jerdi qashyqtyqtan zondtaý sýretterimen birge eldi mekenniń ornalasqan jeri, jaqyndaǵy sý kózderi, joldar, órt oshaǵy men aýmaǵy, jeldiń jyldamdyǵy men baǵyty týraly málimetter anyqtalady.
«Derekter óńdelgennen keıin, málimet órt oryn alǵan oblystaǵy óńirlik bólimshege jiberiledi. Atap aıtqanda, sáýirden bastap ǵaryshtyq monıtorıngtiń arqasynda dala órtteri oshaqtarynyń 70 paıyzyn ýaqtyly anyqtap, aýyzdyqtaýǵa múmkin boldy»,-dedi M. Qaısanov.
