Ǵaryshtyq monıtorıng: Byltyr 5683 ruqsat etilmegen qoqys orny anyqtaldy
ASTANA. QazAqparat – 2022 jyly Qazaqstan boıynsha 5 683 ruqsat etilmegen qoqys obektileri anyqtaldy, dep habarlaıdy QazAqparat tilshisi.
Ortalyq kommýnıkatsııalar qyzmetinde ótken brıfıngide Tsıfrlyq damý, ınnovatsııalar jáne aeroǵarysh ónerkásibi mınıstrligi Aeroǵarysh komıtetiniń tóraǵasy Baýbek Oralmaǵambetov elimizde zańsyz qoqys eń kóp tógiletin 3 iri qalany atady.
«Qatty turmystyq qaldyqtardyń ǵaryshtyq monıtorıngi 2018 jyldan beri júrgizilip keledi. Monıtorıng 39 iri eldi-meken aýmaǵynda júrgizildi. Osy ýaqyt aralyǵynda 25 mln gektar qamtyldy. Oblystar arasynda úıindilerdiń eń kóp sany Aqmola oblysynda - 830, Qaraǵandy oblysynda - 745, Túrkistan oblysynda – 408. Qalalardyń arasynda eń kóp qoqys oryndary úsh qalada anyqtaldy. Máselen, Astanada - 551, Shymkent qalasynda – 45 jáne Almatyda – 12», - dep málim etti Baýbek Oralmaǵambetov.
