Ǵaryshtan jasalǵan fotolar Qazaqstandaǵy 1,1 myń qoqys úıindisin anyqtady

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstrligi 2020 jyldyń birinshi jartyjyldyǵynda ǵaryshtyq monıtorıngileý arqyly anyqtalǵan qoqys úıindilerine qatysty málimetti usyndy, dep habarlaıdy QazAqparat.

Vedomstvodan málim etkendeı, atalǵan kezeńde 1114 stıhııalyq qoqys úıindisi anyqtaldy.

«Jyl basynan 12 geoservıs jumysy ózektendirildi. 3,5 myń birlik nemese tunyqtyǵy joǵary 1,5 mln sharshy km bolatyn ǵarysh túsirilimderi usynyldy. Sondaı-aq, tunyqtyǵy ortasha sýretter bar, olardyń sany 75 birlik nemese 440 myń sharshy km asady.

Ǵarysh monıtorınginiń nátıjeleri memlekettik organdardyń jumysynda qoldaný úshin mamandandyrylǵan geoservısterge júkteledi. Budan basqa, derekterdi ıntegratsııalaýdy oryndaý úshin jergilikti atqarýshy organdardyń aqparattyq júıelerimen salystyrý turaqty júrgiziledi.

Mysaly, ǵaryshtyq monıtorıngileý arqyly búginde jalpy aýdany 350 myń sharshy km-den astam aýylsharýashylyq alqaptarynyń pishini ózektendirildi, shamamen 19 mln gektar dándi daqylǵa arnalǵan egistik alańy anyqtaldy. Sondaı-aq, orman aǵashyn kesýdiń 1104 polıgony qanshalyqty zańǵa saı jumys istep jatqany taldandy. Ǵarysh sýretteri tótenshe jaǵdaılardy anyqtaýǵa da kómektesedi: 87 myńnan astam termaldi núkte belgili boldy jáne 1073 órt oqıǵasy tirkeldi, órtengen aýmaqtyń aýdany 650 myń gektardan asady», - delingen aqparatta.