Ǵaryshtaǵy qyzmetke joǵary tehnıkalyq bilimi bar mamandar qajet - T. Musabaev
Bul týraly búgin Astanada Nazarbaev ýnıversıtetiniń stýdentterimen bolǵan kezdesýde QR Ulttyq ǵarysh agenttiginiń tóraǵasy Talǵat Musabaev málim etti.
«Biz otrıadqa bakalavr deńgeıindegi kadrlardy qyzmetke almaımyz, kem degende kásibı-magıstrlik bilimi bar daıyn maman qajet. Magıstratýrany elektronıka nemese jalpy tehnıkalyq mamandyq boıynsha, negizinen qozǵaltqyshtar, planerler, ushý apparattary baǵytynda mamandyqtar tańdaǵan durys», - deıdi stýdentterdiń saýalyna jaýap qaıyrǵan T. Musabaev.
Onyń aıtýynsha, alǵash ret QR Ulttyq ǵarysh agenttigi qurylǵan tusta ǵarysh salasynyń joǵary deńgeıli ári bilikti mamandary joqtyń qasy edi. Sol kezde búkil álemnen Keńes Odaǵynda bilim alǵan burynǵy kadrlar tartyla bastady. Qazirgi ýaqytta maman jetispeýshiligi QR Prezıdentiniń «Bolashaq» stıpendııasy aıasynda qamtamasyz etilýde. Alaıda onyń ózi jetkiliksiz bolyp otyr. T. Musabaevtyń oıynsha, keleshekte Nazarbaev ýnıversıtetiniń áleýeti de bul salaǵa oń áserin tıgizýi tıis.
