Ǵaryshkerler orbıtadan Tımýr Bekmambetovtyń jańa fılmin tamashalady
ASTANA. 23 jeltoqsan. QazAqparat /Sara Qabıqyzy/ - Máskeý túbindegi Ushý saparlaryn basqarý ortalyǵynda rejısser Tımýr Bekmambetovtyń «Elkı» kórkem fılminiń ǵaryshtyq premerasy ótti, dep habarlady ortalyqtyń baspasóz qyzmetinen.
Ushý saparlaryn basqarý ortalyǵy men Halyqaralyq ǵarysh stansasynyń arasynda bolǵan telekópir barysynda ekıpajdyń reseılik músheleri - Aleksandr Kalerı, Oleg Skrıpochka jáne Dmıtrıı Kondratev fılmdi, Ortalyqqa ekskýrsııaǵa kelgen kalýgalyq oqýshylarmen, kınony túsirý tobynyń ókilderimen jáne jýrnalıstermen birge tamashalady.
Kıno kórsetilimnen keıin ǵaryshkerler saýaldarǵa jaýap berdi jáne óz oılarymen bólisti. Olar, bıylǵy Jańa jyldy úsh ret - Máskeý men Hıýstondaǵy ushý saparlaryn basqarý ortalyqtarynyń ýaqyty boıynsha jáne Halyqaralyq ǵarysh stansasy jumys isteıtin Grınvıch ýaqyty boıynsha qarsy alatyndaryn aıtty. Sóz sońynda ǵaryshkerler jınalǵan qaýymdy kele jatqan Jańa jyldarymen quttyqtady.
Stansamen teleseans aıaqtalǵannan keıin ortalyqta baspasóz máslıhaty ótti. «Elkı» fılminiń rejısseri Tımýr Bekmambetov jýrnalısterdiń saýaldaryna jaýap berdi, kelesi jylǵy shyǵarmashylyq josparlarymen, ǵarysh taqyrybyna arnalǵan jańa fılm túsirý týraly oılarymen bólisti.
