Ǵaryshkerler kúni: Aqtaýlyq oqýshylar aspanǵa zymyran ushyrdy

AQTAÝ. QazAqparat - Búkilálemdik avıatsııa jáne kosmonavtıka kúni Aqtaý qalasyndaǵy Nazarbaev Zııatkerlik mektebiniń oqýshylary mektep alańynda 8 zymyrandy kókke ushyrdy, dep habarlaıdy QazAqparat tilshisi.

Balalar birsatyly oq-dárili zymyrandy oqý ornynda ótip jatqan «Ǵylym» dekadasy aıasynda uıymdastyrylǵan zymyran qurastyrý sheberlik saǵatynda jasap úırengen.

Zııatkerlik mektepte 8 sáýirden beri balalardy naqty ǵylym túrlerimen aınalysýǵa shaqyratyn «Ǵylym» taqyrybyndaǵy onkúndik ótip jatyr. Fızıka, hımııa, matematıka, bıologııa pánderinen kún saıyn qyzyqty zertteý sabaqtaryn, sheberlik saǵattar men baıqaýlardy ótýde. Sondaı sharanyń biri - zymyran qurastyrý sheberlik sabaǵyn fızıka kafedrasynyń ustazdary ótkizip, balalarǵa erekshe kóńil-kúı syılady. Sheberlik saǵatyna ǵarysh salasyna erekshe qyzyǵatyn oqýshylar tańdap alyndy.15-ke jýyq oqýshy óz qoldarymen zymyran jasap, onyń jumys jasaý mehanızmimen tanysty.

«Ǵaryshqa ushatyn zymyrandardy kórgende bárimiz de onyń qalaı qurastyrylatynyn, júıeniń qalaı jumys jasaıtynyn bilgimiz keledi. Búgingi sheberlik saǵaty bizdiń sol oıymyzdy júzege asyryp, zymyran qurastyrý salasyndaǵy bilimimizdi keńeıtýge kómektesedi. Sharanyń erekshe tusy - muǵalimderimizdiń zymyrandy qolda bar qatty qaǵaz, penoplast, turba, qalam,syzǵysh sekildi zattardan jasaýǵa bolatynyn kórsetkeni», - deıdi oqýshy Dana Zarkým.

Aıta ketý kerek, oqýshylar zymyran qurastyrý jáne ushyrýmen alǵash ret aınalysyp otyrǵan joq. Olar jyl saıyn zymyrandy ushyrýdyń ártúrli joldaryn baqylap kórip, eksperımentter jasaıdy.

«Bul salaǵa osydan eki jyl buryn qyzyǵa bastadym. Ótken jyly biz sý qysymynyń kómegimen zymyran ushyrýǵa tyrystyq. Biraq ol kezde qurylǵymyz ushpap edi. Al bıyl biz birsatyly túrin jasap, ony oq- dári kómegimen ushyryp kórdik. Bir sátte tórt zymyran qatar ushqanyn kórgen dostarymyz qatty qoldaý bildirdi. Biz odan saıyn qyzyǵa tústik»,- deıdi 10-synyp oqýshysy Maǵjan Ýteev.