Ǵaryshker Aıdyn Aıymbetov «Almaty oblysynyń qurmetti azamaty» atandy

TALDYQORǴAN. QazAqparat -  Halyq qaharmany, Áskerı-áýe kúshteriniń general-maıory, Taldyqorǵannyń týmasy Aıdyn Aıymbetovke «Almaty oblysynyń Qurmetti azamaty» ataǵy berildi. Ǵaryshkerge arnaıy káýlikti Naýryz merekesin toılaýǵa jınalǵan kópshilik aldynda Almaty oblysynyń ákimi Amandyq Batalov tabys etti, dep habarlaıdy QazAqparat tilshisi.

Taldyqorǵanda ıgi dástúr boıynsha Naýryz meıramy qala syrtyndaǵy bulaqtyń kózin ashýdan bastaldy. Oblys basshysy aqsaqaldarmen, «Jasyl el» jasaǵynyń múshelerimen birge saıabaq ishine aǵash ekti. Jetisý tórinde búgingi merekege oraı 1 myń lıtr naýryz kóje men 10 myń adamǵa palaý ázirlenip, halyqqa tegin taratyldy. Soǵan sáıkes, Naýryz aýylynda «Naýryz kóje ishińiz!», «Baýyrsaqtan dám tatyńyz!» atty arnaıy sharalar uıymdastyryldy. Merekeni tamashalaýǵa shyqqan qala turǵyndary arqan tartysyp, asyq atyp, gir tasyn kóterip, toǵyzqumalaq oınady, túrli kórmelerdi tamashalady. Al Taldyqorǵan ıppodromynda dala qyzyqtary ótti. Aýdaryspaq, qyz qýý, teńge ilý uıymdastyrylyp, kókparshylar saıysyna qarjylaı syılyqtar tigildi.

Mereke kontserttik baǵdarlamaǵa ulasyp, halyqqa kóterińki kóńil-kúı syılaýda. Aýa-raıy da tamasha bolyp tur. Termometr baǵany + 22 gradýsqa deıin kóterildi.  Al keshke «Jastar» saıabaǵynda bı keshi uıymdastyrylady.