Ǵaryshqa saıahattaǵan robot Fedor Jerge oraldy

BAIQOŃYR. QazAqparat – Baıqońyr ǵarysh aılaǵynan ushyrylǵan robot «Fedor» orbıtada 12 kún jumys istep, aman-esen Jerge oraldy, dep habarlaıdy QazAqparat.

Bortynda robot Fedor Skybot F-850 bar «Soıýz MS-14» ǵarysh kemesiniń apparaty Jezqazǵan qalasynan ońtústik-shyǵysqa qaraı 147 shaqyrym qashyqtyqta Nur-Sultan ýaqytymen 03 saǵat 32 mınýtta qondy.

Roskosmos baspasóz qyzmetiniń aqparaty boıynsha, «Soıýz MS-14» ǵarysh kemesiniń jerge qonýy jáne orbıtadaǵy jumysy boıynsha barlyq operatsııa shtattyq rejimde ótken.
Eske salaıyq, «Soıýz-MS» kóliktik kemesi bar «Soıýz-2.1a» jańa zymyran-tasyǵyshy Baıqońyr ǵarysh aılaǵynan 2019 jyldyń 22 tamyzynda ushyryldy. Alaıda, ǵarysh kemesi Halyqaralyq ǵarysh stansasyna (HǴS) belgilengen ýaqytta túıise almady.
Budan buryn «Soıýz-2.1a» zymyrany orbıtaǵa tek «Progress» júk kemeleri men túrli baǵyttaǵy ǵarysh qurylǵylaryn shyǵaryp otyrdy. 25 qyrkúıekke josparlanǵan ushyrylymnan keıin «Soıýz-2.1a» zymyran-tasyǵyshyn «Soıýz-FG» kemesine aýystyrady.
Avtor: Sara Qabıqyzy