Ǵarysh kemesi apatyn Qazaqstan men Reseıdiń úkimetaralyq komıssııasy tekseredi

ASTANA. QazAqparat - «Soıýz MS-10» ǵarysh kemesiniń apatqa ushyraýyna baılanysty Qazaqstan men Reseı arasynda úkimetaralyq komıssııa qurylady. Bul týraly búgin QR ІІM Tótenshe jaǵdaılar komıtetiniń tóraǵasy Vladımır Bekker aıtty, dep habarlaıdy QazAqparat tilshisi.

«Qalaı bolǵanda da qazaqstandyq jáne reseılik tarap ókilderiniń qatysýymen úkimettik komıssııa qurylady. Onyń quramyna barlyq múddeli memlekettik organdar kiredi. Oqıǵa tekserilip, qorytyndy shyǵarylatyn bolady», - dedi ol.

Onyń dereginshe, ǵarysh kemelerin ushyrý týraly kelisimge sáıkes reseılik tarap Qazaqstanǵa ǵarysh kemeleriniń ushyrylý kestesin aldyn ala usynady.

«Ushyrymǵa deıingi 24 saǵatta biz ǵarysh kemesi ushyp ótetin trassa boıyna jumyldyrylýy múmkin bólimshelerimizdi kúsheıtilgen daıyqqa kóshiremiz. Qazaqstan tarapynyń kúshteri men qural-jabdyqtary Reseı tarapyna kómek kórsetýge daıyn boldy. Alaıda Reseı tarapy Qazaqstannyń qutqarý qyzmetiniń kómeginen qajettiliktiń bolmaýy sebepti bas tartty», - dedi Vladımır Bekker.

Buǵan deıin ǵarysherlerdiń din-aman ekendigin, qazirgi ýaqytta olardy izdeý-qutqarý toby Baıqońyr ǵarysh aılaǵyna apara jatqanyn, al ǵarysh kemesiniń ekinshi satysynyń qaı jerge qulaǵandyǵy belgisiz ekendigin  habarlaǵan bolatynbyz.

Aıta keteıik, búgin 14 saǵat 40 mınýt 15 sekýndta Baıqońyr ǵarysh aılaǵynyń Gagarın start alańynan orbıtaǵa basqarylatyn kóliktik «Soıýz MS-10» kemesin alyp shyǵýy tıis «Soıýz FG» zymyran tasyǵyshy ushyryldy. Biraq start berilgen soń birneshe mınýttan keıin Roskosmos saıtyndaǵy tikeleı kórsetilim úzilip, dıktor «zymyran tasyǵyshtyń apatqa ushyraǵanyn» habarlaǵan edi.

«Soıýz MS-10» kemesiniń bortynda Roskosmos ǵaryshkeri Alekseı Ovchının men NASA ǵaryshkeri Nık Heıg bar.

Sál keıinirek apatqa ushyraǵan zymyrannyń vıdeosy jarııalandy.