Garvard jáne Oksford oqýlyqtary alǵash ret qazaq tiline aýdarylady

ASTANA. QazAqparat - Garvard ýnıversıtetindegi (AQSh) Gregorı Menkıýdiń ekonomıkalyq jáne Oksford ýnıversıtetinen (Ulybrıtanııa) Entonı Kennıdiń fılosofııa tarıhy jónindegi oqýlyqtary alǵash ret qazaq tiline aýdarylmaqshy.

Bul oqýlyqtardyń aýdarylýy QR Prezıdenti N.Nazarbaevtyń «Bolashaqqa baǵdar: rýhanı jańǵyrýy» atty maqalasynda qarastyrylǵan qoǵamdyq jáne gýmanıtarlyq ǵylymdar jónindegi «Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda júzege asyrylǵaly otyr, dep habarlaıdy «QazAqparat» HAA tilshisi.

Fılosofııa, sotsıologııa, psıhologııa, mádenıettaný, fılologııa jáne ekonomıka (menedjment jáne kásipkerlik) boıynsha joǵarǵy oqý oryndaryna arnalǵan oqýlyqtardy aýdarý jumystary júrgizilip jatyr. Alǵashqy oqýlyqtar kelesi 2018-2019 oqý jyldarynda qoldanysqa enedi dep josparlanyp otyr.

«Kez kelgen aýdarma úlken shyǵarmashylyqty talap etetin jumys jáne aıtarlyqaı qıyndyqtary da bar. Ásirese ǵylymı taqyryptardy aýdarǵan kezde árkimniń pikiri de ár túrli bolyp keledi (...) Sol sebepti aýdarma jumystaryna aǵylshyn, qazaq tilderin biletin jáne osy pándi jetik meńgergen joǵary oqý oryndarynyń oqytýshylary tartyldy», - dedi OKQ-inde ótken brıfıngte taıaýda ǵana qurylǵan Ulttyq aýdarma bıýrosynyń basshysy Raýan Kenjehanuly.

Onyń aıtýynsha, qazirgi ýaqytta aýdarma jumysyna 90 adam qatysýda, olardyń arasynda oqytýshylar, redaktorlar jáne aýdarmashylar bar.

«Oqýlyqtardyń basym bóligi aǵylshyn, sondaı-aq, frantsýz, nemis tilderinen aýdarylyp jatyr. Tek bir oqýlyq qana orys tilindegi túpnusqamen jazylǵan. Bul joba aıasynda AQSh, Ulybrıtanııa, Shveıtsarııa jáne Frantsııanyń jetekshi baspa uıymdarymen aramyzda seriktestik qatynas ornatyldy», - dedi R.Kenjehanuly.