Garvard ýnıversıteti Tramp ákimshiligin sotqa berdi

ASTANA. KAZINFORM – Garvard ýnıversıteti dúısenbi kúni AQSh-tyń federaldyq sotyna ýnıversıtet baǵdarlamalaryna bólingen 2 mlrd dollardan astam úkimettik qarjylandyrýdy toqtatqan Tramp ákimshiligine qarsy shaǵym túsirdi, dep habarlaıdy VVS.

Ótken aptada Garvard ýnıversıteti Donald Tramp ákimshiliginiń DEI saıasatymen (ártúrlilik, teńdik jáne ınklıýzıvtilik) baılanysty barlyq baǵdarlamalaryn toqtatý jáne kampýs aýmaǵynda maska taǵýǵa tyıym salý talaptaryn qabyldaǵan joq.

Buǵan jaýap retinde bılik Garvardqa federaldy qarjylandyrýdy buryn bólingen 9 mlrd dollardan 2,2 mlrd dollarǵa qysqartyp, ýnıversıtetti salyq jeńildikteri men sheteldik stýdentterdi qabyldaý múmkindiginen aıyramyz dep qorqytty.

Donald Tramp merziminiń basynan beri oqý oryndarynda solshyl ıdeologııa jáne antısemıtızmmen belsendi kúresip keledi. Ol Gazadaǵy qaqtyǵys bastalǵaly kolledj kampýstarynda kúsheıgen Izraılge qarsy jappaı narazylyqty osyndaı úrdisterdiń kórinisi dep sanaıdy.

Osy sııaqty talaptar birqatar basqa ýnıversıtetterge, sonyń ishinde Prınston men Kolýmbııaǵa da qoıyldy . Alaıda ákimshiliktiń áreketine sotqa birinshi bolyp shaǵymdanǵan Garvard boldy.

Buǵan deıin AQSh Garvard-qa bólinetin 2,2 mlrd dollar memlekettik qarjylandyrýdy toqtatatynyn jazǵan bolatynbyz.

Sondaı-aq Tramp Garvardqa bólgen 1 mlrd dollar qarjyny keri qaıtarmaq.