Garvard stýdentterge qoıylatyn «úzdik» baǵalardy shekteıdi
ASTANA. KAZINFORM — Harvard University Óner jáne ǵylym fakýlteti bakalavrıat stýdentterine qoıylatyn «úzdik» baǵalardyń sanyn qysqartatynyn málimdedi. Bul týraly agenttiktiń Vashıngtondaǵy menshikti tilshisi NBC News-ke silteme jasap habarlady.
Ýnıversıtet mundaı sheshimdi joǵary baǵalardyń shamadan tys kóbeıip ketýine baılanysty qabyldaǵan.
Oqytýshylardyń pikirinshe, qazirgi júıe stýdentterdiń erekshe jetistikterin naqty baǵalaýǵa múmkindik bermeı otyr.
Bastamany qoldaǵan professorlar usynǵan ýnıversıtet derekterine sáıkes, sońǵy jyldary stýdentter alǵan baǵalardyń 60 paıyzdan astamy «úzdik» bolǵan.
Usynysty ázirlegen fakýltet janyndaǵy kishi komıtet quramynda bolǵan Garvard ýnıversıtetiniń psıhologııa professory Joshua Greene bul ózgeris stýdentterge táýekelden qoryqpaı bilim alýǵa múmkindik beretinin aıtty.
-Eger eń joǵary baǵalar sırek qoıylatyn bolsa, stýdentter minsiz úlgerimdi saqtaýǵa emes, bilim alýǵa kóbirek kóńil bóledi, — dedi ol.
Reforma avtorlarynyń aıtýynsha, jańa júıe «Garvardtaǵy úzdik baǵa stýdenttiń naqty jetistigin kórsetetin kórsetkishke aınalýyna» jol ashady. Bul ózgeris jumys berýshiler men magıstratýra baǵdarlamalary úshin de mańyzdy bolady.
Ýnıversıtet jańa saıasatty 2027 oqý jylynan bastap engizýdi josparlap otyr.
Aıta keteıik, baǵalardy shamadan tys kóterý máselesine tap bolǵan jalǵyz elıtalyq oqý orny Garvard emes. Princeton University 2004 jyly «úzdik» baǵalardy jalpy úlestiń 35 paıyzymen shekteý týraly sheshim qabyldaǵan. Alaıda oqý orny on jyldan keıin bul júıeden bas tartty. Sebebi synshylar mundaı tásil stýdentterdiń jumysqa ornalasýy men magıstratýraǵa túsý múmkindigine keri áser etetinin aıtqan.
Osyǵan deıin qazaqstandyq ǵalymdar Garvard ýnıversıtetinde qoljazbalarmen jumys isteý ádisterin zerttegeni týraly jazdyq.
