Garvard mamandary Qazaqstannyń sırek qoljazbalaryn tsıfrlandyrady
ASTANA. KAZINFORM – Garvard kitaphanasy men arhıvi qazaq ǵalymdaryna qoljetimdi boldy. Bul jumystar Qazaqstannyń Ǵylym jáne joǵary bilim mınıstrligi men Garvard ýnıversıtetiniń Devıs atyndaǵy eýrazııalyq zertteýler ortalyǵy arasyndaǵy memorandým aıasynda júrgizilmek.
− Ótken jyly amerıkalyq ǵalymdar Almatydaǵy «Ǵylym ordasyna» qarasty Ortalyq ǵylymı kitaphanaǵa kelgen edi. Ǵasyrlyq tarıhy bar kitaphanada 6 mıllıon kitap qory, 150 myń sırek qoljazbalar bar. Atap aıtqanda, Shyǵystyń kóne tilderindegi, Eýropa tilderindegi kóptegen zerttelmegen-zerttelmegen dúnıe jatyr. Kitaphananyń ǵasyrǵa jýyq tarıhy bar, kezinde Qanysh Sátpaevtyń tusynda qurylǵan kitaphanada qazir túrli ǵylymı jýrnaldar, ǵylymı kitaptar jınaqtalǵan, − dedi «Ǵylym ordasy» RMK Ortalyq ǵylymı kitaphana dırektory Ular Muqajanov Jibek Joly telearnasyna bergen suhbatynda.
Kelisim aıasynda Garvard mamandary Qazaqstannyń sırek kitaptary men qoljazbalaryn tsıfrlandyrýǵa, restavratsııalaý men saqtaýǵa kómektesetin boldy. Osylaısha halqymyzdyń eń kóne qoljazbalardy halyqaralyq ǵylymı aınalymǵa shyǵady.
Odan bólek, taraptar akademııalyq tájirıbe almasýǵa, Qazaqstan mamandaryna stıpendııalar men ǵylymı taǵylymdamalar uıymdastyrýǵa ýaǵdalasty.
− Bizdiń jas ǵalymdarymyzdyń, kitaphanashy, arhıv qyzmetkerleriniń ol jaqta taǵylymdamadan ótýi úshin Garvardtyń arnaıy talaptary bar. Til bilgen, talapqa saı ótip turǵan mamandar ǵana taǵylymdaman ótýge bara alady. Árıne, bul bizdiń jas ǵalymdarymyz úshin kóptegen joldy ashady dep oılaımyn. Biz de Garvard ýnıversıtetiniń talaptaryna saı keletin mamandardy qazirden daıyndap jatyrmyz. Ǵylym ordasynda til kýrstaryn ashtyq. Óıtkeni bizge osy múmkindikti paıdalanyp, ózimizdiń mamandardy daıarlap alý maqsaty tur. Mundaǵy mańyzdy nárse – óz mamandarymyzdyń kásibı biliktiligin arttyrý, ǵalymdarymyzdy daıyndaý, − deıdi kitaphana basshysy.
Sonymen birge, Garvardtyń bedeldi ǵalymdary da Qazaqstanǵa kelip, oqý-ádistemelik quraldaryn úıretedi. Qazaqstannyń baı mádenı jáne tarıhı murasy týraly kórmeler ótip, jahan nazaryn aýdarý da kózdelip otyr. Jáne eń bastysy – osy kelisim sheńberinde Almatyda Qoljazbataný ǵylymı-zertteý ortalyǵy ashylady.
Buǵan deıin Italııa men Qazaqstan ǵalymdary men joǵary oqý oryndary qaı salalarda ortaq joba jasaıtyny habarlanǵan edi.
Sondaı-aq, Grýzııa qazaqstandyqtarǵa 5 bilim grantyn bóldi.