Garvard 60 mln dollar grantynan aıyryldy

ASTANA. KAZINFORM – AQSh-tyń Densaýlyq saqtaý mınıstrligi Garvard ýnıversıtetine bólingen birneshe kópjyldyq granttardy qarjylandyrýdy toqtatty, dep habarlaıdy Kazinform agenttigi. 

Bul týraly AQSh Densaýlyq saqtaý mınıstrligi áleýmettik jelide (X) jarııalaǵan habarlamasynda aıtyldy.

— AQSh-tyń Densaýlyq saqtaý jáne áleýmettik qyzmetter mınıstrligi joǵary bilim salasyndaǵy azamattyq quqyqtardy qorǵaý úshin batyl sharalar qabyldap jatyr. Garvard ýnıversıtetiniń antısemıttik qysym men násildik kemsitýshilikpen kúrese almaýy saldarynan mınıstrlik birneshe kópjyldyq granttardy bólýdi toqtatady, — dep málimdedi mınıstrlik.

Málimdemege sáıkes, granttardyń jalpy somasy shamamen 60 mıllıon dollar boldy.

Buǵan deıin Garvard ýnıversıteti eki esep jarııalaǵan bolatyn — biri kampýstaǵy antısemıtızm men Izraılge qarsy kóńil-kúıge, ekinshisi — ıslamǵa qarsy kózqarasqa qatysty. Garvard prezıdenti Alan Garber ýnıversıtettiń stýdentter men qyzmetkerlerdiń úmitin aqtaı almaǵany úshin keshirim surady.

Sáýir aıynyń ortasynda AQSh Bilim mınıstrligi Garvardqa bólinetin federaldy granttardy toqtatatynyn málimdedi. Buǵan sebep — ýnıversıtettiń mınıstrlik talaptaryn oryndaýdan bas tartýy, onyń ishinde «stýdentter men qyzmetkerlerdiń kózqarasyn» tekserýge qatysty aýdıt ótkizý talaby bolǵan.

Odan keıin Donald Tramp Garvardty arnaıy salyq mártebesinen jáne sheteldik stýdentterdi qabyldaý múmkindiginen aıyrý qaýpin tóndirdi.

Ýnıversıtet prezıdent ákimshiligin sotqa berip, qarjylandyrýdy qalpyna keltirýdi talap etti.