Garrı Potter týraly romandar avtorynyń oryndyǵy Nıý-Iorkte 394 myń dollarǵa satyldy
ASTANA. QazAqparat - 2009 jyly Djoan Roýlıng 1930 jyly emennen jasalǵan oryndyǵyn qaıyrymdylyq bássaýdasyna shyǵarǵan bolatyn.
Búkil álemge tanymal jazýshy áıeldiń Edınbýrgtaǵy páterinde mundaı oryndyqtardyń tórteýi bar, biraq bul jıhaz zattary erekshe qundy bolǵan joq. Al saýdaǵa shyǵarylǵan oryndyq Garrı Potterdi súıýshiler úshin qundy boldy, sebebi Roýlıng bul oryndyqta otyryp, ataqty sıqyrshy bala týraly eki roman jazǵan.
Bássaýdanyń aldynda jazýshy oryndyqta: «Múmkin, sizderge ádemi bolyp kórinbespin, biraq syrtyma qarap baǵalamańyzdar. Men «Garrı Potterdi» osy oryndyqta otyryp jazdym», - degen jazba qaldyrdy.
Keıinnen bul oryndyqty belgisiz satyp alýshy 29 myń dollarǵa satyp aldy. Buǵan deıin ol Nıý-Iorktegi bássaýdaǵa qaıta shyǵarylǵan eken. Jıhaz zaty aldyn ala onlaın-saýdada 65 myń dollarǵa jetken, aqyry lot rekordtyq soma - 394 myń dollarǵa satyldy, dep jazady informing.ru.
