Ǵaryshta qalyp qoıǵan Starliner astronavtary qashan úıine oralady
ASTANA. KAZINFORM — Jer orbıtasynda turyp qalǵan amerıkalyq ardager ǵaryshkerler Sýnı Ýılıams pen Batch Ýılmor kelesi jyly ǵana Jerge oralady, dep habarlady BBC NASA málimetine silteme jasap.
Osylaısha Boeing kompanııasy shyǵarǵan Starline kemesiniń Halyqaralyq ǵarysh stantsııasyna alǵashqy sapary sátsiz dep tanyldy.
Ýılıams pen Ýılmor úıge josparlanǵandaı bir apta ótkende emes, 8 aıdan soń oralady. Olar Starliner-de emes, Boeing-tiń basty básekelesi — Ilon Masktyń amerıkalyq SpaceX kompanııasynyń kemesimen ushyp keledi.
«Olar HǴS-71 jáne HǴS-72 ekspedıtsııalarynyń ekıpajynda 2025 jyldyń aqpanyna deıin jumysyn jalǵastyrady. Sodan keıin SpaceX joldaǵan Srew-9 mıssııasynyń ózge eki múshesimen birge Dragon ǵarysh kemesine minip úıge qaıtady», — dedi amerıkalyq ǵarysh agenttigi.
Al Starliner jerge bos oralady.
«Túıisken kemeni ǵarysh stantsııasynan ajyratý qyrkúıek aıynyń basynda júzege asady. Starline qaýipsiz, baqylanatyn avtonomdy atmosferada kirip qonady», — dep habarlady NASA.
Boeing pen SpaceX reseılik «Soıýzdy» almastyrýǵa arnalǵan ǵarysh apparattaryn qurý quqyǵy úshin jarysyp jatyr. Olar sonaý 2014 jyly NASA-men mıllıardtaǵan dollarlyq kelisimshart jasaǵan.
SpaceX halyqaralyq ǵarysh stansasyna toǵyz ekspedıtsııa jiberip úlgerdi, al Boeing-ke tıesili Starliner úshin bul alǵashqy sapar edi.
Mıssııa áý bastan-aq tehnıkalyq qıyndyqtarǵa tap boldy: janarmaı júıesinen bes márte gelıı aqty, HǴS-ǵa qoný kezinde 28 manevrlik qozǵaltqyshtyń beseýi isten shyqty.
Maýsym aıynan bastap NASA jáne Boeing ınjenerleri jınalǵan derekterdi taldaýǵa tyrysty, ushý jáne jer synaqtaryn ótkizdi, táýelsiz saraptamalarǵa tapsyrys berdi. Sonda da ekıpajdyń Starliner-men qaıtyp kelý qaýipsizdigine kóz jetkizý múmkin bolmady.
