Ǵaryshta qalyp qoıǵan qytaılyq taıkonavttar Jerge qashan oralady

ASTANA. KAZINFORM — Qytaıdyń «Shenchjoý-20» ǵarysh kemesiniń ekıpajy juma kúni «Shenchjoý-21» bortynda Jerge oralýdy josparlap otyr, dep habarlaıdy Sınhýa.

Qytaıdyń Ǵaryshtyq ushý baǵdarlamasy basqarmasynyń (CMSA) málimetinshe, ekıpajdyń Іshki Mońǵolııa avtonomııalyq aýdanyndaǵy Dýnfen alańyna qonýy 14 qarashaǵa josparlanǵan. 

— Ekıpaj músheleri Chen Dýn, Chen Chjýnjýı jáne Van Tszeniń densaýlyǵy jaqsy, al qoný alańy men barlyq qoldaý júıesi qazirgi ýaqytta olardyń oralýyna daıyndalyp jatyr, — delingen vedomstvo málimdemesinde.

CMSA málimetinshe, kelesi ǵarysh kemesi «Shenchjoý-22» bolashaqta qolaıly ýaqytta ushyrylady.

Eske sala ketsek, ekıpajdyń oralýy 5 qarashaǵa josparlanǵan bolatyn. Ǵarysh qoqysy orbıtaǵa túskennen keıin oralý keıinge qaldyryldy. Stantsııa úsh adamdy ornalastyrýǵa arnalǵan, biraq mıssııa aýysýlary kezinde alty ekıpaj múshesine deıin ýaqytsha ornalastyra alady. 

Buǵan deıin mamandar orbıtada 200 kúnnen astam ýaqyt ótkizgen qytaılyq «Shenchjoý-20» basqarylatyn ǵarysh kemesiniń ekıpaj múshelerin qaıtarýdyń jańa josparyn quryp jatqanyn jazǵan bolatynbyz.