Ǵaryshker dep at qoıdym: Dımash Qudaıbergen Prezıdent syılaǵan tazysyn kórsetti
ASTANA. KAZINFORM — Ánshi, qazaq halqynyń maqtanyshy Dımash Qudaıbergen qazaq tazysy kúnine oraı biregeı kadrlar jarııalady.
— Búgin — qazaq tazysy kúni. Sizdermen biregeı kadrlarmen bóliskim keledi. Birinshi sýrette meniń qasymda Memleket basshysynyń Nensı jáne Naýryz atty tazylary. Al ekinshi sýrette — bárimiz jaqsy kóretin tulpar Aqjannyń ákesimen birge túsken sátim. Memleket basshysynyń tulparymen serýendep qaıtý men úshin úlken mártebe boldy, — dep jazdy ol.
Ol óziniń tazysyna qatysty erekshe oqıǵasy baryn aıtyp, ony Prezıdentimiz Qasym-Jomart Kemeluly syılaǵanyn jazdy.
— Men oǵan Ǵaryshker dep at qoıdym, — dep jazdy ánshi.
Dımash Qudaıbergen osy biregeı kadrlar úshin Prezıdent Teleradıokeshenine alǵys bildirdi.
Aıta keteıik, búgin elimizde Qazaq tazysy men tóbeti kúni alǵash ret atalyp ótip jatyr.
Ǵasyrlardan jetken tuqymnyń tól bolmysyn saqtap, damytý baǵytynda qandaı jumystar atqarylyp jatqanyn Kazinform tilshisiniń taldaý maqalasynan oqyńyz.
