Ǵaryshker Aıdyn Aıymbetov Qaraǵandydaǵy mektep oqýshylarymen kezdesti
QARAǴANDY. KAZINFORM - Qaraǵandyda qazaqstandyq ushqysh, ǵaryshker Aıdyn Aıymbetov mektep oqýshylarymen kezdesti. Batyrǵa qurmet kórsetý Ǵaryshkerler kúnine jáne onyń ǵaryshqa ushýynyń 10 jyldyǵyna oraılastyryldy, dep habarlaıdy Kazinform agenttiginiń tilshisi.
Qaraǵandydaǵy birneshe mekteptiń oqýshylary № 2 Oqýshylar saraıyna jınaldy. Saraı kireberisinde oblys ortalyǵynyń jáne seriktes qalalardyń kórkemóner mektepteri oqýshylary eńbekteriniń kórmesi uıymdastyryldy. Týyndylardyń taqyryby ǵaryshpen baılanysty boldy.
— Ǵaryshkerlik taqyryby kórkemóner mektepteriniń bilim berý baǵdarlamasyna engizilgen. Ol balalardy erekshe baýraıdy. Men ózim úshin dıplomdyq jumystar aıasynda bizge ǵarysh taqyrybyn kóbirek jarııalaý kerek degen oı túıdim. Bizdiń qoǵam úshin bul óte qyzyqty jáne ózekti. Bul taqyryp ózektiligin joǵaltpaıdy, - deıdi № 1 balalar kórkemsýret mektebiniń dırektory Gúlmıra Kalysheva.
Ǵarysh jáne onymen baılanysty barlyq nárse balalardy qatty qyzyqtyratynyn Oqýshylar saraıyna jınalǵan balalar sanynan kórýge bolady. Ǵaryshker Aıdyn Aıymbetovpen kezdesýge júzdegen oqýshy keldi. Ǵaryshty baǵyndyrǵan qazaq batyry ǵaryshker mamandyǵy balalar arasynda áli kúnge deıin ózekti bolyp qala beretinin moıyndaıdy.
— Kóptegen bala men oqýshy ǵaryshty armandaıdy. Astanada «Jas ǵaryshkerler mektebin» ashqan kezde alǵashynda 30 baladan jáne bir toptan bastalyp, 500 oqýshyǵa deıin jetti. Mektepke kelemin deýshiler sany sonsha, tipti oryn jetispeı qalyp, konkýrs jarııalaýǵa týra keldi. Sondyqtan bul mamandyqqa súıispenshilik áli de joǵary deýge bolady, - deıdi ǵaryshker.
Sondaı-aq Aıdyn Aıymbetov Qaraǵandy qalasyndaǵy № 6 mektepte ǵaryshkerlikke arnalǵan murajaıdy aralady.
Aıta ketý kerek, Qazaqstan ǵaryshynyń erekshe buryshy qazaq tili men ádebıeti muǵalimi Maǵrıpa Káribekovanyń uıytqy bolýymen qurylǵan. Buǵan bilikti muǵalim 33 jyl ómirin arnaǵan. Osy jyldar aralyǵynda ol mektep oqýshylaryn ǵana emes, tarıhshylardy da tańǵaldyratyn eksponattar jınady.
— Bul murajaıdan ǵaryshkerliktiń teorııalyq máselelerin ázirlegen ǵalym Konstantın Tsıolkovskııdiń eńbek jolynan bastap Qazǵaryshtyń búgingi kúnine deıingi ǵarysh týraly materıaldardy kórýge bolady. Men bul murajaıǵa 1992 jyldan bastap eksponattar men málimetter jınaı bastadym. Kóptegen kórme ótkizdik. Tipti shalǵaıdaǵy aýyldarǵa da kóshpeli kórmelermen baryp, aýyl balalaryn ǵaryshtyń ǵajaıyp álemimen tanystyrdyq, - deıdi murajaıdyń negizin qalaýshy Maǵrıpa Káribekova.
Eske sala keteıik, buǵan deıin qaraǵandylyq sýretshi Káripbek Kúıikovtiń kartınalary Nıý-Iork kórermenderin tánti etkenin jazǵan edik.