Ǵarysh salasyn qarjylandyratyn ınvestıtsııalyq qor ashý múmkindigi talqylanyp jatyr
ASTANA. KAZINFORM – Ǵarysh salasyn qarjylandyrýdyń jańa tásilderi retinde ınvestıtsııalyq qor ashý múmkindigi talqylanyp jatyr. Bul jaıynda Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
«Úkimettiń 2023 jylǵy 28 naýryzdaǵy qaýlysymen qurylǵan tehnologııalyq bazanyń tıimdiligin arttyrý, ózin-ózi qamtamasyz etetin ǵarysh salasyn qalyptastyrý, halyqaralyq kooperatsııa sııaqty negizgi tásilderdi kózdeıtin Ǵarysh salasyn damytýdyń 2023-2029 jyldarǵa arnalǵan tujyrymdamasy bekitildi. Salany damytý jónindegi strategııalyq mindetterdi Aeroǵarysh komıteti oryndaıdy. Oǵan qajetti retteý, iske asyrý jáne baqylaý fýnktsııalary berilgen. Ǵarysh salasyn damytý jónindegi jumystyń negizgi baǵyty – memlekettik tapsyrmalar arqyly respýblıkalyq bıýdjetten qarjylandyrylatyn mańyzdy jáne kapıtaldy qajet etetin jobalardy iske asyrý. Ǵarysh salasyn qarjylandyrýdyń jańa tásilderi retinde ınvestıtsııalyq qor ashý múmkindigi talqylanýda. Alaıda bul másele egjeı-tegjeıli zertteýdi qajet etedi», - dedi Úkimet basshysy jaýabynda.
Oljas Bektenovtiń atap ótýinshe, ǵarysh salasyndaǵy negizgi jobalardy iske asyrý Úkimet pen ýákiletti organnyń turaqty baqylaýynda tur.
«Máselen, «Ulttyq ǵaryshtyq zertteýler jáne tehnologııalar ortalyǵy» AQ ǵaryshtyq zymyran keshenin qurý úshin tehnologııalardy ázirleý boıynsha zertteýlerdi jalǵastyryp jatyr. Serbııa, Qytaı jáne Úndistan mamandaryn tartý boıynsha jumystar júrgizilýde. Tehnologııalar transferti jáne qazaqstandyq mamandar úshin taǵylymdamalardy uıymdastyrý máseleleri talqylanyp jatyr. 2023-2024 jyldarǵa ǵylymı baǵdarlamany iske asyrýǵa 908,8 mln teńge bólindi. 2025-2027 jyldarǵa taǵy 2,8 mlrd teńgege bıýdjettik ótinim berildi», - dedi Premer-Mınıstr.
