Ǵarysh áskerı básekeniń tikeleı alańyna aınaldy — Ulybrıtanııa ÁÁK basshysy
ASTANA. KAZINFORM — Ulybrıtanııa ǵaryshtaǵy spýtnıkterin túrli qaýipten qorǵaýǵa arnalǵan alǵashqy mamandandyrylǵan bólimshesin qurdy, dep habarlaıdy Kazinform agenttiginiń Londondaǵy menshikti tilshisi.
Sársenbi kúni Ulybrıtanııa Qorǵanys mınıstrligi eldiń Áskerı-áýe kúshteri quramynda ǵarysh operatsııalaryna jaýap beretin 3-eskadrılıa qurylatynyn habarlady.
Áskerı qyzmetshiler brıtandyq áskerı spýtnıkterdiń qalypty jumysyna kedergi keltiretin áreketterge tosqaýyl qoıady. Negizgi nazar kemelerdiń navıgatsııasyn, mobıldi baılanysty jáne zymyran ushyrý týraly eskertý júıelerin qamtamasyz etetin spýtnıkterdi qorǵaýǵa baǵyttalady.
Osy maqsatta áskerı qyzmetshiler zamanaýı radıoelektrondyq kúres quraldarymen jabdyqtalady. Bul quraldar nysandy joımaı-aq, sıgnaldardy basyp, qarsy taraptyń elektrondyq júıeleriniń jumysyna kedergi keltiredi.
Ulybrıtanııa Qorǵanys mınıstrliginiń málimetinshe, jańa eskadrılıa qorǵanys jáne shabýyldaý sıpatyndaǵy ǵarysh operatsııalaryna qatysady. Alaıda London shabýylǵa qatysty naqty mindetterin ázirge jarııalaǵan joq.
Jańa qurylymnyń paıda bolýyn spýtnıktik tehnologııalardyń el ómirindegi mańyzynyń artýymen baılanystyrady. Búginde olar mobıldi baılanys, navıgatsııa jáne aýa raıyn boljaý sııaqty mańyzdy salalardyń turaqty jumysyn qamtamasyz etedi. Tótenshe jaǵdaı kezinde orbıtalyq júıeler polıtsııaǵa, órt sóndirý jáne jedel járdem qyzmetterine de qoldaý kórsetedi.
— Ulybrıtanııa jańa ǵaryshtyq básekege ilese bilýi kerek. XIX ǵasyrda teńizdegi ústemdik eldiń qorǵanysyn qamtamasyz etýdiń negizgi tetigi boldy. Sondyqtan Ulybrıtanııa tarıhtaǵy eń qýatty áskerı-teńiz kúshteriniń birin qalyptastyrdy. XX ǵasyrda basty másele áýe keńistigin baqylaýǵa aýysty. Sol sebepti el ózin qorǵaý úshin álemdegi jetekshi áskerı-áýe kúshteriniń birin qurdy. Al bul ǵasyrdyń taǵdyry ǵarysh keńistigin baqylaýǵa baılanysty bolady, — dedi Ulybrıtanııa Qorǵanys mınıstri Ýes Strıtıng.
Onyń aıtýynsha, spýtnıkterdiń mańyzy artqan saıyn, olarǵa tónetin qaýip te kúsheıip keledi. Mundaı qaterdiń aýqymy keńeıip, ǵaryshtaǵy básekelestik Jerdegi geosaıası teketiresti aıqyn kórsetip otyr.
Ulybrıtanııa Áskerı-áýe kúshteri shtabynyń basshysy Harv Smıt ǵaryshty áskerı básekeniń derbes baǵyty dep atady.
— Ǵarysh endi áskerı operatsııalardy qoldaıtyn qosalqy qural emes. Bul — áskerı basymdyq úshin tikeleı báseke júretin jańa baǵyt, — dedi ol.
Jańa eskadrılıa Ulybrıtanııa Áskerı-áýe kúshteriniń ǵarysh baǵytyna jaýap beretin úshinshi bólimshesi bolady. Buǵan deıin qurylǵan eki eskadrılıa qaýip-qaterdi baqylap, eskertýge jaýap berse, jańa bólimshe mundaı qaterlerge tikeleı qarsy áreket etedi.
Brıtan bıligi ǵarysh keńistigin beıbit ári turaqty paıdalanýdy qoldaıtynyn málimdedi. London orbıtadaǵy spýtnıkterdi joıyp, ǵarysh nysandarynyń qaýipsizdigine qater tóndiretin spýtnıkke qarsy zymyrandardyń synaqtaryn ótkizbeıtinin resmı túrde jarııalady.
Ulybrıtanııa BUU-nyń Ǵaryshty beıbit maqsatta paıdalaný jónindegi komıteti aıasyndaǵy jumysyn jalǵastyryp, ǵarysh keńistiginde jaýapty áreket etý normalary men qaǵıdattarynyń saqtalýyn qoldaıdy.
Sonymen qatar London bul baǵytqa bólinetin qarjyny arttyryp otyr. Úkimet 2030 jylǵa deıin ǵaryshtyq barlaý, baqylaý, aqparat jınaý jáne ǵarysh keńistigin baqylaý sharalaryna 880 mln fýnt sterlıng bólýdi josparlap otyr.
Buǵan deıin Qytaı ǵaryshqa spýtnıkterdiń jańa tobyn ushyrǵanyn habarlaǵan edik.
