Garet Saýtgeıt Anglııa quramasynyń bas bapkeri qyzmetinen ketti

ASTANA. KAZINFORM – Anglııa quramasynyń bas bapkeri Garet Saýtgeıt qyzmetinen ketti. Bul týraly ulttyq quramanyń baspasóz qyzmeti habarlady. 

Jattyqtyrýshynyń kelisimshart merzimi 2024 jyldyń jeltoqsanynda aıaqtalady. Alaıda bas bapker qyzmetinen óz ótinishi boıynsha ketip jatqanyn málimdedi. 

2016 jyldyń qyrkúıeginde Anglııanyń tizginin ustaǵan Saýtgeıt quramamen birge 102 oıyn ótkizdi. 

Taıaýda Germanııada ótken Eýropa chempıonatynyń fınalynda Anglııa quramasy Ispanııadan 1:2 esebimen jeńilip qalǵan bolatyn. Oıyndaǵy birinshi goldy shabýylshy Nıko Ýılıams salsa, Anglııa quramasy sapynan Koýl Palmer 73-mınýtta tarazy basyn teńestirgen. Alaıda 86-mınýtta alańǵa qosalqy quramanan shyqqan Mıkel Oıarsabal jeńisti goldy soqty. 

Garet Saýtgeıttiń Anglııa quramasyndaǵy jetistikteri: 

2018: ÁCh / jartylaı fınal

2019: Ulttar lıgasy / jartylaı fınal

2020: Eýro / fınal

2022: ÁCh / shırek fınal

2024: Eýro / fınal